|
កុមារជាអនាគតរបស់ប្រទេសជាតិ
Posted: 23rd June 2008
ទិវាពលកម្មកិមាអន្តរជាតិ
|
ជារៀងរាល់ឆ្នាំកម្មវិធីបណ្ណាល័យរបស់ព្រះសហគមន៍កាតូលិកកំពង់ចាមក្រុង បានប្រារព្វកម្មវិធីទិវាកុមារ អន្តរជាតិនៅតាមបណ្ដាលព្រះសហគមន៍ និងភូមិភាគផ្សេងៗ។ ឆ្នាំនេះក៏ដូចជាឆ្នាំមុនៗដែរ តែងតែប្រារព្វកម្មវិធីនេះ នៅតាមព្រះសហគមន៍ និងបណ្ដាលភូមិផ្សេងៗមួយចំនួន។ កាលពីថ្ងៃទី ៣១-០៥-០៨នៅព្រះសហគមន៍ក្តុរលើមានប្អូនៗប្រមាណចំនួន ២០០នាក់ ដែលពួកគាត់ពោរពេញដោយទឹកមុខស្រស់ស្អាត និងសប្បាយចិត្តរីករាយពោរពេញដោយសេចក្តីសង្បឹមចូលរួមក្នុងកម្មវិធីទីវាកុមារអន្តរជាតិ។ ក្នុងកម្មវិធី នេះដែលក៏មានការអញ្ជើញចូលរួមពីសំណាក់សិស្សានុសិស្ស តំណាងមាតាបិតា រឺអាណាព្យាបាល លោកគ្រូអ្នកគ្រូ លោកនាយកសាលា និងលោកមេឃុំ មេភូមិចូលរួមជាគណធិបតេយ្យ តំណាងបណ្ណាល័យ លោកឪពុក និងគណៈកម្មការរបស់ព្រះសហគមន៍។
យើងធ្វើកម្មវិធីនេះទ្បើង ដើម្បីលើកស្ទូយដល់សិទ្ទិកុមារ។ ក្នុងនោះដែរអ្នកគ្រូភាព នៅសាលាសាមគ្គីក្តុរលើមានមតិសំណេះសំណាលដល់ប្អូនៗអោយយល់ពីអត្ថន័យនៃសិទ្ឋិទាំងបួនយ៉ាងរបស់ពួកគាត់យ៉ាងដូច្នេះថា " កុមារត្រូវតែមានសិទ្ឋិទាំងបួនយ៉ាងគឺៈ សិទ្ឋិរស់រាន្តមានជិវិត ពួកគេត្រូវតែទទួលចំណីអាហារអោយបានគ្រប់ គ្រាន់ ថ្នាំសំរាប់ព្យាបាលនៅពេលក្មេងមានជំងឺឈឺថ្កាត់។ សិទ្ឋិការពារគឺត្រូវមានការរើសអើងចំពោះកុមារ រឺមានការជូញដូរផ្នែកផ្លូវភេទ ការរំលោភបំពានទៅលើរាង្គកាយ។សិទ្ឋិចូលរួមបញ្ជេញមតិយោបល់ និងទទួលព័ត៌មានពីគ្រប់មជ្ឈដ្ឋានទាំងអស់នៅក្នុងប្រទេស និងសិទ្ឋិចុងក្រោយបង្អស់របស់កុមារ គឺសិទ្ឋិអភិវឌ្បន៍ ផ្នែកបញ្ញាស្មារតី អោយមានសមត្ថភាពគ្រប់គ្រាន់ដើម្បីរៀបចំអនាគតខ្លូនឯង និងប្រទេសជាតិ ផងដែរ។ ហើយអ្នកគ្រូបានបន្ថែមទៀតថា"សូមអោយឪពុកម្តាយ រឺអាណាព្យាបាលបញ្ជូនកុមារអោយទៅរៀនទាន់ ពេលវេលា កុមារធ្វើការហូសកំលាំងទ្បើយ " ។
ក្រោយពីអ្នកគ្រួបានផ្តល់អត្ថន័យនៃសិទ្ឋីបួន យ៉ាងរបស់កុមារយ៉ាងក្បោះក្បាយហើយនោះ ក៏មានប្អូនៗចំនួន ពីរនាក់ដែលពួកគាត់មានចិត្តក្លាហានដូចជាប្អូនស្រី ពិសី និងប្អូនប្រុស តារាហ៊ានទ្បើងបញ្ចេញទស្សនៈ និងចំនាប់អារម្មណ៍យ៉ាងដូច្នេះថា "ពួកគាត់មានភាពរីករាយណាស់ដែលមានវត្តមាននៅក្នុងកម្មវិធីនេះ ពួកខ្ញុំនឹងប្តេជ្ញាខិតខំរៀនសូត្រដើម្បីអនាគត ព្រមទាំង មានមតិផ្តាំផ្ញើរអោយប្អូនៗផ្សេងទៀត ត្រូវខិតខំព្យាយាមរៀនសូត្រ។ ក្រោយពីមានការផ្តាំផ្ញើរពីប្អូនៗទាំងពីរនាក់នេះ រួមក៏មានតំណាងអាណព្យាបាលរបស់សិស្សទ្បើងមានចំនាប់អារម្មណ៍ និងអរគុណចំពោះ អ្នករៀបចំកម្មវិធីនេះ ដែលពោរពេញទៅដោយអំណរសប្បាយនៅក្នុងដូងចិត្តរបស់គាត់។ មិនតែប៉ុណ្ណោះនៅក្នុងកម្មវិធីនេះ ធ្វើទ្បើងអោយកុមារមានទំនាក់ទំនងយ៉ាងជិតស្និទ្ឋជាមួយមិត្តភក្តិនិងមានអំណរសប្បាយជាមួយគ្នា។ ក្នុងនេះដែរ មានក្រុមយុវជនបានជួយរៀបចំ ផ្នែកចំរៀងកំសាន្ត ល្បែងប្រជាប្រិយ និងរបាំ ផ្សេងៗ ដើម្បីអោយកម្មវិធីនេះ ដំណើរការទៅដោយអំណរសប្បាយបំផុត។ ជាមួយគ្នានេះដែរ ដើម្បីជាការ លើកទឹកចិត្តដល់ប្អូនៗ ដែលមានវត្តមាននៅទីនេះ យើងបានរៀបចំម្ហូបអាហារយ៉ាងឆ្ងាញ់ ដើម្បីទទួលប្អូនៗ មួយពេល។ ក្នុងកម្មវិធីនេះ ខាងបណ្ណាល័យរបស់ព្រះសហគមន៍ជូនការដូរលើកទឹកចិត្តដល់ប្អូនៗម្នាក់ៗនៅ ពេលបញ្ចប់កម្មវិធីនេះ ។
កម្មវិធីនេះបានប្រារព្ឋធ្វើនៅតាមព្រះសហគម៍ និងកន្លែងផ្សេងៗដែលមានលក្ខណះប្រហាក់ប្រហែលនិង កម្មវិធីនៅភូមិក្តុរលើដែលដោយមានការអញ្ជើញចូលរួមពីគណធិបតេយ្យ អាណាព្យាបាលសិស្ស លោកគ្រូ អ្នកគ្រូ សិស្សានុសិស្ស មេឃុំ មេភូមិ តំណាងផ្នែកបណ្ណាល័យចូលរួម ។ ពួកគាត់មានមតិយោបល់ និងផ្តល់ដំបូន្មានល្អៗជូនទៅដល់សិស្សានុសិស្សនៅក្នុងឆ្នាំនេះយើងបានធ្វើកម្មវិធីនេះនៅតាមភូមិ និងព្រះសហគមន៍ ដូចជា នៅថ្ងៃទី ០១/៦/០៨ធ្វើព្រឹកធ្វើនៅមណ្ឌលថែរក្សាភូមិអណ្ដូងច្រុះមានប្អូនៗកុមារចំនួន ១០០នាក់ព្រះសហគមន៍កោះរកាចំនួន ៣០០នាក់ ព្រះសហគមន៍ចំទ្បាក់មានប្អូនៗចំនួន ១០៥នាក់ និងធ្វើនៅពេលរសៀលមាននៅព្រះសហគមន៍ភូមិថ្មី មានប្អូនៗចំនួន ១០០នាក់ សាលាមតេយ្យភូមិថ្មពេជ្រ ចំនួន ១៣០នាក់។ នៅថ្ងៃទី ០៨-០៦-០៨ បានប្រារព្វធ្វើនៅក្នុងភូមិរលៀក មានប្អូនៗ ចំនួន ៧០នាក់ និងព្រះសហគមន៍ស្វាយរៀងមានប្អូនៗចំនួន ២៧៧នាក់សរុបប្អូនៗទាំងអស់មានចំនួនប្រមាណ ១២៧២នាក់។
Article Source: ការិយាល័យព៌ត័មានកាតូលិក កម្ពុជា
|
Print this page
News #570