|
យើងស្រក់ទឹកភ្នែកព្រោះនឹកឃើញកំហុសរបស់យើង
Posted: 30th March 2008
ការសម្តែងព្រះយេស៊ូរងទុក្ខ នៅព្រះសហគន៍បាត់ដំបង
|
បាត់ដំបង(C.S.C) ៖សំលេងវាយវាត់ខ្លាំងៗពីសំណាក់មនុស្សមួយក្រុមទៅលើបុរសម្នាក់ កំពុងលីឈើឆ្កាង ហើយត្រូវគេវាយ ពីក្រោយផង ធ្វើឲ្យ អ្នកទស្សនាភ័យរន្ឋត់ ទប់ទឹកភ្នែកមិនបាន។ នេះជាការសម្តែងអំពីទុក្ខលំបាករបស់ព្រះយេស៊ូឆ្លងតាមដំណាក់កាលទាំង១៤ ដែល ព្រះសហគមន៍តែងហៅថា ពិធីដើរព្រះឈើឆ្កាង។ បួនឆ្នាំមកហើយ ដែលព្រះសហគមន៍កាតូលិកខេត្តបាត់ដំបង(នៅពេទ្យយាយជី)នៃភូមិភាគបាត់ដំបង រៀបចំការសម្តែងនេះ ឡើងនៅរៀងរាល់ថ្ងៃសុក្រពិសិដ្ឋ ក្នុងរដូវ អប់រំពិសេស។
សម្តែងនេះបានធ្វើឲ្យមានការរំជួលចិត្តយ៉ាងខ្លាំងក្នុងក្រអៅបេះដូងរបស់អ្នកទស្សនា ជាពិសេសគ្រីស្តបរិស័ទកាតូលិក។ មិនថាចាស់មិនថាក្មេងឡើយ ពួកគាត់លុតជង្គុងចុះហើយអធិដ្ឋានដោយទឹកមុខ ស្រងូតស្រងាត់កណ្ដាលទីវាលដ៏ធំក្នុងបរិវេនព្រះវិហារខេត្តបាត់ដំបង។ អ្នកស្រី បូរី បានឲ្យដឹងថា ពេលដែល យើងដើរអញ្ចឹងយើងនឹកឃើញអំពីទោសកំហុសរបស់យើងដែលបានធ្វើក្នុងជីវិតរបស់យើងរួមជាមួយទុក្ខលំ បាករបស់ព្រះយេស៊ូ ហើយសូមព្រះអង្គជួយឲ្យយើងចេះអត់ធ្មត់ចេះអត់ទ្រាំដូចព្រះអង្គដែរដោយស៊ូទ្រាំលំបាករហូតដល់សោយទីវង្គត។ និយាយដោយសំដី មួយៗអ្នកស្រីបន្ថែមថាអ្នកស្រីមានការរំជួលចិត្តណាស់នេពេលដែលគេវាយវាត់ព្រះអង្គនិងត្រូវគេប្រមាថគ្រប់បែបយ៉ាង។ ព្រះអង្គផ្តល់គំរូឲ្យគ្រីស្តបរិស័ទគឺឲ្យគ្រីស្តបរិស័ទចេះអត់ធ្មត់។
នៅក្បែរនោះដែរ អ្នកស្រី សំ សារី ហៅគ្រុយ អាយុ៥២ឆ្នាំ បានលើកឡើងថា" សាច់រឿងដែលគេលេង នឹងមិនមែនយំស្រណោះបុគ្គលនឹងទេ។ យើងស្រក់ទឹកភ្នែកដោយសារយើងនឹកឃើញពីទុក្ខលំបាករបស់ ព្រះយេស៊ូ។ យើងនឹកឃើញទោសកំហុសដែលយើងធ្លាប់ធ្វើកន្លងមក ព្រោះមនុស្សយើង នរណាម្នាក់ក៏ធ្លាប់ធ្វើខុសដែរ។" ផ្អាកនិយាយមួយសន្ទុះ អ្នកស្រីសារីវាចារថា ក្នុងដំណាក់កាលទាំងអស់គាត់មានការរន្ឋត់ចិត្ត នៅពេលដែលព្រះយេស៊ូជួបជាមួយម្តាយរបស់ព្រះអង្គ។ លោកស្រីបានបញ្ជាក់ដោយសំលេងស្រទន់ និងក្តុកក្តួលយ៉ាងដូច្នេះ"យើងជាស្រី យើងធ្លាប់មានកូន។ នៅពេលយើងឃើញគេវាយកូនរបស់យើង យើងស្លុតណាស់។ ដូច្នេះព្រះមាតាជាគំរូដល់យើង ស៊ូទ្រាំការលំបាកគ្រប់យ៉ាង។ ហើយយើងសព្វថ្ងៃយកគំរូពីព្រះជាម្ចាស់ និងពីព្រះនាងម៉ារីដែរ ដោយយើងលះបង់ ស៊ូទ្រាំអត់ធ្មត់នៅក្នុងគ្រួសារ ជាមួយកូនចៅយើងដូចព្រះនាងម៉ារីអញ្ចឹង។"
និយាយពីតួអង្គព្រះយេស៊ូ ដែលសម្តែងដោយលោកបូជាចារ្យហ្គាប៊ីបានឲ្យដឹងថា ការសម្តែងមានការ ភ័យខ្លាច និងទទួលការឈឺចាប់បន្តិច តែលោកពេញចិត្ត និងស្ម័គ្រចិត្តធ្វើ។ "ពេលសម្តែងភ័យដែរ ខ្លាចគ្រោះថ្នាក់ពីព្រោះឈើឆ្កាងធំ និងទោះបីគេអត់ដាក់ដែកគោល ប៉ុន្តែវាខ្ពស់ដែរ និងខ្ញុំខ្លាចឈើឆ្កាងដួលទៅមុខ ឬមានបញ្ហាយ៉ាងម៉េចនោះ ខ្ញុំនឹងទៅមន្ទីរពេទ្យ ព្រោះចំនុចនោះយើងអត់ដែលហាត់ទេ។" លោកបូជាចារ្យបញ្ជាក់។ ភ្ជាប់ជាមួយគ្នានេះ លោកបូជាចារ្យហ្គាប៊ីពន្យល់ថា "ខ្ញុំគិតថា បើខ្ញុំសម្តែងជាតួព្រះយេស៊ូ នេះល្អម្យ៉ាងដែរ ហើយមានប្រយោជន៍សំរាប់ជំនឿ និងអាចជួយពួកគាត់ឲ្យមានអារម្មណ៍ដូចសម័យនោះ។
គ្រីស្តបរិស័ទអាចមានអារម្មណ៍ដូចក្រុមសាវ័ក ឬមិត្តភក្តិរបស់ព្រះយេស៊ូពេលនោះដែរ ពេលគេវាយ ទាត់ធាក់លោក(បូជាចារ្យ)។ ចំពោះខ្ញុំ អាចស្រម៉ៃឃើញដែរ នូវអ្វីដែលព្រះយេស៊ូគិត ឬគាត់ខ្លាច គាត់ភ័យ ឈឺ គាត់ស្រលាញ់គេដែរ។ ការសម្តែងនេះអាចចូលខ្លះ អារម្មណ៍ដែលព្រះយេស៊ូមាន។"
ទោះបីនេះជាការសម្តែង តែបានជះឥទ្ឋិពលយ៉ាងខ្លាំងចំពោះអ្នកចូលទស្សនា។ ត្រង់ចំណុចនេះលោកបូជាចារ្យ ហ្គាប៊ីបន្តសំដីទាំងអួលអាក់ ជាមួយកែវភ្នែកពោពេញដោយទឹកភ្នែកដូច្នេះថាមានពុទ្ឋបរិស័ទពីរនាក់បានសុំលោកឲ្យយកបាបរបស់ពួកគេទៅថ្វាយព្រះអង្គនៅលើឈើឆ្កាង។
ពេលនោះបានធ្វើឲ្យលោកមានការភ្ញាក់ផ្អើលយ៉ាងខ្លាំង។ ការសម្តែងនេះ មិនត្រឹមជាការសម្តែងប៉ុណ្ណោះទេ តែបានផ្តល់ឲ្យពុទ្ឋបរិស័ទចង់ធ្វើនេះលោកក៏បានធ្វើពិធីតាមរបៀបស្រាយបាបតាមគ្រីស្តសាសនាទៅពួកគាត់ទាំងពីរ។ កំពុងលុតជង្គុង ភ្នែកសំឡឹងមើលទៅផ្ទាំងទស្សនីយ៍ភាពគួឲ្យភ័យខ្លាចជាមួយអ្នកចូលរួមប្រមាណជាង ៤0០នាក់ យុវជនហេង ស៊ង់បានឲ្យដឹងថា "គួរឲ្យស្ញើបដែរ យើងឃើញថាមានបងប្អូនខ្លះគាត់មិនយល់ថានេះជាការសម្តែង ហើយគាត់ដាក់អារម្មណ៍ស៊ីជម្រៅទៅនឹងព្រះបន្ទូលរបស់ព្រះយេស៊ូ អញ្ចឹងមើលឃើញការសម្តែងរបស់ពួកគេហ្នឹងសាហាវ។ ប៉ុន្តែខ្ញុំជឿថា ការសម្តែងនេះល្អដែរដែលធ្វើឲ្យទឹកចិត្តបងប្អូនមួយចំនួនមានអារម្មណ៍រំភើប និងក្តុកក្តួលមែនទែន ធ្វើឲ្យគេនឹកឃើញទុក្ខលំបាកព្រះយេស៊ូនាសម័យនោះ។" ស៊ង់បានបន្តទៀតថា ចំពោះរូបគាត់វិញ គឺមិនខុសពី អ្នកចូលរួមទាំងអស់ប៉ុន្មានទេ "ខ្ញុំខំទប់អារម្មណ៍ខ្លួនឯង ជួនកាលចង់យំម្តងៗដែរ ហើយគិតថានេះគ្រាន់តែជា ការសម្តែងប៉ុណ្ណោះ។ តែការសម្តែងរបៀបហ្នឹងធ្វើឲ្យយើងនឹកឃើញអំពីអតីតកាលជាទុក្ខលំបាករបស់ព្រះយេស៊ូ គួរឲ្យយើងយល់ ហើយចងចាំក្នុងចិត្តរបស់យើងដែរ។" លោកបូជាចារ្យតូតែត ជាតំណាងគ្រប់សិទ្ឋិរបស់លោកអភិបាលភូមិភាគបាត់ដំបងបានមានប្រសាសន៍ថា ពិធីដើរឈើឆ្កាងនេះព្រះសហគមន៍នៅខេត្តបាត់ដំបងបានរៀបចំឡើងកាលពីឆ្នាំ២០០៥ បើគិតមកដល់ឆ្នាំនេះគឺជាឆ្នាំទី៤ហើយ។ ក្នុងឆ្នាំនោះ ក្នុងរដូវ៤០ថ្ងៃ នៅថ្ងៃសុក្រពិសិដ្ឋ ព្រះសហគមន៍ចាប់ផ្តើមសម្តែងសាកល្បងហើយទទួលបានការចាប់អារម្មណ៍ពីសំណាក់គ្រីស្តបរិស័ទ។ "បងប្អូនមើលទៅគឺល្អ ដូចជាជួយយើងអធិដ្ឋានតាមដំណាក់កាលនៃផ្លូវឈើឆ្កាង ប៉ះពាល់ដល់អារម្មណ៍យើង កាលណាគេវាយព្រះយេស៊ូ។ គ្រាន់តែស្តាប់ ព្រះបន្ទូលជួនកាលអត់សូវស៊ីជំរៅដល់ស្មារតីរបស់យើងទេ បើយើងមើលគេសម្តែងទើបវាស៊ីជំរៅទៅនឹង ស្មារតីរបស់យើង ទើបយើងអាចអធិដ្ឋានបាន។ អំបាញ់ម៉ិញហ្នឹង បងប្អូនគេយំ មកពីគេយល់ គេបានបញ្ចូលស្មារតីរបស់គេតាមរយៈសាច់រឿង ហើយការសម្តែងនេះធ្វើឲ្យគេមានការជិតស្និទ្ឋនឹងទុក្ខលំបាករបស់ព្រះ យេស៊ូ។" បន្តសំដីដោយទឹកមុខញញឹម លោកបូជាចារ្យជនជាតិហ្វីលីពីនរូបនេះ បានឲ្យដឹងថា អ្វីដែលសំខាន់ ក្នុងការសម្តែងនេះគឺព្រះសហគមន៍ចង់ឲ្យគ្រីស្តបរិស័ទយល់ពីជំនឿ។ កម្មវិធីរបស់ព្រះសហគន៍ក្នុងមួយឆ្នាំនេះគឺការបកស្រាយអត្ថន័យរឿងព្រះយេស៊ូដែលព្រះអង្គបានធ្វើនៅក្នុងថ្ងៃព្រះយេស៊ូរងទុក្ខលំបាក និងថ្ងៃព្រះយេស៊ូមានព្រះជន្មនរស់ឡើងវិញដ៏រុងរឿង។ ក្នុងមួយឆ្នាំជីវិតរបស់យើងជាគ្រីស្តបរិស័ទ ត្រូវការបកស្រាយ អត្ថន័យនៃការសំដែងនេះ ដូចជាការបន្ទាបខ្លួន ការបង្ហាញធម៌មេត្តាករុណា ការលើកលែងទោសអ្នកដទៃ ការលីឈើឆ្កាងជាមួយព្រះយេស៊ូ ការជួយគ្នាទៅវិញទៅមកដូចលោកស៊ីម៉ូនដែលជួយព្រះអង្គ។ នេះមិនមែន សំរាប់តែមួយថ្ងៃនេះទេ នេះជាកំពូលនៃជំនឿ ហើយវាមានឥទ្ឋិពលពេញមួយជីវិតរបស់គ្រីស្តបរិស័ទ។ លោកបូជាចារតូតែតបានលើកទឹកចិត្តដល់គ្រីស្តបរិស័ទ ដែលចូលរួមក្នុងពិធីនេះថា "យើងជាគ្រីស្តបរិស័ទត្រូវតែមានសេចក្តីសង្ឃឹមនៅក្នុងជីវិត។
ភាគច្រើនយើងជួយទុក្ខលំបាកនៅក្នុងជីវិតទាំងមនុស្ស ធំ និងកូនក្មេង ទោះជាគ្រីស្តបរិស័ទ ឬពុទ្ឋបរិស័ទក៏ដោយ។ ជួនកាលយើងជាអ្នកក្រ យើងអត់មានសុភមង្គល នៅក្នុងក្រុមគ្រួសារ ហើយពេលខ្លះយុវជន មានអារម្មណ៍ថាអត់ចង់ដើរទៅមុខជាដើម។ ព្រះជាម្ចាស់បានផ្ញើ បុត្រារបស់ព្រះអង្គឲ្យគង់នៅជាមួយយើងក្នុងទុក្ខលំបាករបស់យើង នេះបញ្ជាក់ថា យើងអត់មានដើរក្នុងទុក្ខ លំបាកនេះតែម្នាក់ឯងទេ ហើយព្រះអង្គយល់ចិត្តយើងដែលជាអ្នករងទុក្ខលំបាក ព្រោះព្រះអង្គបានេកីតជា មនុស្សដើម្បីបានបទពិសោធន៍ដូចគ្នា។ ដូច្នេះយើងត្រូវលីឈើឆ្កាងរបស់យើងបន្តទៀត។"
Article Source: ការិយាល័យផ្សព្វផ្សាយព័ត៌មានកាតូលិកកម្ពុជា
|
Print this page
News #555