|
ព្រះវិហារថ្មីក្រោយការចាប់រយៈពេល១៥ឆ្នាំនៅភ្នំពេញ
Posted: 25th January 2008
ពិធីសម្ភោធព្រះវិហារព្រះកុមារយេស៊ូ
|
ភ្នំពេញ (CSC)៖ ការជួបជុំឡើងវិញរបស់គ្រីស្តបរិស័ទកាតូលិកនៅប្រទេសកម្ពុជា នៅដើមទសវត្ស៩០ បន្ទាប់ពីសង្គ្រាមដរ៉ាំរ៉ៃ និងសម្លាប់រង្គាល់យ៉ាងព្រៃផ្សៃ បានរលត់ទៅ។ នៅពាក់កណ្ដាលទសវត្សទី ៧០ សាសនាទាំងអស់ត្រូវបំបាត់ទាំងស្រុង ប្រជាជនជាច្រើនត្រូវសម្លាប់ ។ ចំពោះព្រះសហគមន៍កាតូលិក ក៏បានរងគ្រោះយ៉ាងធ្ងន់ធ្ងរ លោកអភិបាល លោកបូជាចារ្យនិងជីដូនជីកាតូលិកជាច្រើនត្រូវបានសម្លាប់ ព្រះវិហារគ្រឹះស្ថាននានា របស់ព្រះសហគមន៍កាតូលិកត្រូវបានបំផ្លាញចោលដែរ។
ព្រះសហគមន៍កាតូលិកបឹងទំពូន ក្នុងខ័ណ្ឌមានជ័យ ក្រុងភ្នំពេញ បានចាប់កំណើតនៅដើមទសវត្សទី៩០ ដោយបងប្អូនខ្មែរ ដែលបានធ្វើមាតុភូមិនិវត្តន៍ពីព្រំដែនខ្មែរ-ថៃ ។ បងប្អូនទាំងនោះបានស្វែងយល់ពី ព្រះសហគមន៍កាតូលិក នៅតាមជំរុំនានា ក្នុងទឹកដីថៃ។ នៅពេលចាប់ផ្តើម បងប្អូនបានជួបជុំនៅតាមផ្ទះ ហើយបានយកផ្ទះធ្វើជាព្រះវិហាររយៈពេល១៥ឆ្នាំ ។
នៅថ្ងៃ ទី ៦ មករា ឆ្នាំ ២០០៨ កន្លងទៅនេះ ព្រះសហគមន៍បឹងទំពុនបានបើកសម្ពោធព្រះវិហារដ៏ធំក្រោមអធិបតេយ្យរបស់ លោក ម៉ាទីណូ ប្រធាន ទីប្រឹក្សាសម្តេចប៉ាប ទទួលបន្ទុកផ្នែក យុត្តិធម៌ និងសន្តិភាព លោកអគ្គរាជទូត សម្តេចប៉ាប ប្រចាំប្រចាំព្រះរាជណាចក្រកម្ពុជា និង លោកអភិបាលព្រះសហកមន៍កាតូលិកទាំងបីភូមិភាគ។ ព្រះវិហារថ្មីបានប្រសិទ្ឋិនាមថា៖ "ព្រះវិហារ ព្រះកុមារយេស៊ូ "។ នៅក្នុងថ្ងៃសម្ពោធនេះ មានអ្នកចូលរួមប្រហែលប្រមាណជា ១០០០ នាក់ ទាំងភ្ញៀវជាតិទូទាំងប្រទេស និង អន្តរជាតិ។ លោក ម៉ាទីណូ បានមានប្រសាសន៍ក្នុងឱកាសនោះថា ព្រះវិហារថ្មីដែលសម្ពោធថ្ងៃនេះជាសញ្ញាសម្ពាល់ខាងក្រៅ នូវបំណងប្រាថ្នា ដែលមានក្នុងចិត្តរបស់យើងជាព្រះសហគមន៍ មានជំនឿចង់ប្រកាសថា ព្រះកុមារយេស៊ូដែលប្រសូតពីព្រះនាងម៉ារី បានរំដោះយើង និងប្រទានឲ្យយើងទទួលជីវិត ពេញបរិបូរណ៍។ លោកបន្តថា៖ ព្រះកុមាយេស៊ូជាព្រះជាអម្ចាស់ដែលបានចាប់កំណើរជាមនុស្ស ព្រះជាម្ចាស់បានស្រឡាញ់ ពិភពលោកនេះ ព្រះអង្គបានប្រទានព្រះបុត្រារបស់ព្រះអង្គ ឲ្យយើង។ ក្នុងពេលនេះ ព្រះជាម្ចាស់ប្រទានពរ និងជួយយើងទាំងផ្លូវកាយ និងចិត្ត
ដោយព្រះវិញ្ញាណដ៏វិសុទ្ឋ។ សូមឲ្យយើងតាងចិត្តសារជាថ្មីក្លាយជាសាវ័កដ៏ជិតស្និតរបស់ព្រះយេស៊ូដើម្បីឲ្យយើងស្គាល់ព្រះអង្គកាន់តែច្បាស់ឡើង និងនាំឲ្យាអ្នកដទៃបានស្គាល់ព្រះ តាមព្រះបន្ទូល អគ្គសញ្ញា និង សន្តិភាពក្នុងជីវិតរបស់យើង។ នៅថ្ងៃនេះដែរសូមឲ្យយើងយកតង្វាយរបស់យើងមកថ្វាយព្រះអង្គ គឺចិត្តស្រឡាញ់ព្រះអង្គ និងស្រលាញ់បងប្អូនឯទៀត ៗ។ តង្វាយជាពាក្យអធិដ្ឋាន និង អំពើរល្អរបស់យើង។
បន្ទាប់ពីពិធីបុណ្យបានបញ្ចប់ លោកបូជាចារ្យ ម៉ារីយ៉ូ អ្នកទទួលខុសទ្រូវព្រះសហគមន៍កាតូលិក បឹងទំពុននេះ បានបង្ហាញអរម្មណ៍រំភើបរីករាយយ៉ាងខ្លាំងចំពោះអ្នកនាមសារ " ខ្ញុំសប្បាយខ្លាំងណាស់ "។ ក្នុងព្រះវិហារថ្មីនេះ មានបញ្ចុះ អដ្ឋិធាតុ សន្តបុគ្គល ពីររូបលើអសនៈ គឺ សន្ត រីកាដូម៉ារីយ៉ាមពុយរ និងសន្ត ពីយ៉ូ មកពីយេត្រាលស៊ីណាប្រទេសអ៊ីតាលី ។
លោកបូជាចារ្យម៉ារីយ៉ូ បានពន្យល់ថា "ការបញ្ចុះអដ្ឋិធាតុលើអសនៈនេះ មានន័យថា យើងអង្វរព្រះជាម្ចាស់តាមរយៈសន្តបុគ្គល ដែលបានឡើងស្ថានមរបសុខហើយ"។ ព្រះសហគមន៍នៅលើផែនដី និង នៅស្ថានបរមសុខរួមអង្វរព្រះជាម្ចាស់ ។ លោកបូជាចារ្យបន្តថា" សន្តរីកាដូម៉ារីយ៉ាបាមពុយរី ជាបូជាចារ្យដែលស្គាល់ចិត្តរបស់មនុស្ស លោកជួយគេឲ្យ ចេះនិយាយស្មោះត្រង់។
ពេលធ្វើពិធីសំរុះសំរួល បើគ្រីស្តបរិស័ទ និយាយ មិនពិត លោកប្រាប់គេភ្លាម"។ ចំពោះ សន្ត ពីយ៉ូ លោកជាគ្រូពេទ្យ ពេលស្លាប់លោកយកសពគាត់ដាក់ក្នុងព្រះវិហារមួយ ។ សព្វថ្ងៃមានគ្រីស្តបរិស័ទជាច្រើនបាន ធ្វើដំណើរទៅ គោរពសពរបស់គាត់ ជាពិសេសអ្នកជំងឹដើម្បីសុំឲ្យឆាប់ជាសះស្បើយ។
ដោយឡែក អ្នកស្រី ងួន ផល្លា ជាសមាជិកគណៈកម្មការរៀបចំពិធីបុណ្យ ក្នុងព្រះសហគមន៍ បឹងទំពុន បានសំដែងអារម្មណ៍រំភើបរបស់ខ្លួនថា "ថ្ងៃនេះអ្នកស្រីរំភើបណាស់ " ព្រោះជាពេលវេលាដែលយើងរំពឹងជាយូរមកហើយ។ ថ្ងៃនេះដែរ ជាពេលវេលាជួបជុំបងប្អូនគ្រីស្តបរិស័ទគ្រប់ទីកន្លែងក្នុងព្រះរាជាណាចក្រកម្ពុជា ។ នេះជាកិត្តិយលសំរាប់ព្រះសហគន៍កាតូលិក បឹងទំពុនដែរដែល លោកទីប្រឹក្សាសម្តេចប៉ាប លោកអគ្គរាជទូតរបស់សម្តេចប៉ាបប្រចាំ ព្រះរាជាណាចក្រកម្ពុជា ដែលបានអញ្ជើញចូលរួមក្នុងពិធីសម្ពោធព្រះវិហារថ្មីនេះ។ ព្រះវិហារថ្មីនេះ ជាក្តីសង្ឃឹមថ្មីរបស់ព្រះសហគមន៍កាតូលិក និងជួយឲ្យជំនឿរបស់យើងរីកចំរើនឡើងដែរ។
Article Source: ការិយាល័យព័ត៌មានកាតូលិក កម្ពុជា
|
Print this page
News #537