|
សំលៀកបំពាក់ប្រពៃណីខ្មែរនិង ការស្លៀកពាក់ក្នុងពិធីផ្សេងៗ
Posted: 26th September 2007
សំលៀកបំពាក់ខ្មែរបែបសម័យ
|
CSC៖ ការស្លៀកពាក់នៅក្នុងពិធីផ្សេងៗជាករណីចាំបាច់ណាស់សំរាប់យុវនារីគ្រប់ៗរូបដើម្បីបង្ហាញពីសោភ័ណ្ឌភាពរបស់ខ្លួនចំពោះមនុស្សជាច្រើននៅជុំវិញ។ ខាងក្រោមនេះជាការណែនាំមួយចំនួននៅក្នុងការស្លៀកពាក់ៈ
ក្នុងពិធីមង្គលការសំលៀកបំពាក់ចូលរួមនៅក្នុងមង្គលការត្រូវប្រើសំពត់ដែលធ្វើនៅស្រុកខ្មែរ ដូចជាហូល ផាមួង អន្លួញ ល្បើក ។ល។ សំ ពត់អស់ទាំងនេះ បើនាងយកមករចនា (កាត់)ប្រើប្រាស់ជារបៀបទាន់សម័យនិយមឃើញថា ល្អសមរម្យលើសសំពត់មក ពីបរទេស ហើយបើនាងស្លៀកពាក់ទៅគេអាចសំគាល់ថា នាងជាស្ត្រីមានលក្ខណៈពេញជានារីខ្មែរ ហើយមានកិត្តិយស ដ៏ខ្ពង់ខ្ពស់ផង។ ជាពិសេសនាងបានជួយលើកស្ទួយសេដ្ឋកិច្ចជាតិយើងឲ្យកាន់តែចំរើនលូតលាស់ទ្វេឡើង ព្រមទាំងបានចំ ណេញថវិកាមិនបាច់ទៅទិញសំពត់បរទេសមកប្រើប្រាស់ឡើយ។
ក្នុងពិធីរាត្រីសមោស
មិត្តនារីទាំងឡាយត្រូវជ្រើសរើសក្រណាត់ណាដែលមានចម្រុះសសៃខ្សែសយ ឬក៏មានពណ៌ភ្លឺ ចំពោះអាវ និងសំពត់ត្រូវ យកពណ៌ប្រហាក់ប្រហែលគ្នា ឬក្រណាត់តែមួយពណ៌ក៏បាន ដោយកាត់ជាឈុតវែង ឬខ្លីតាមការចូលចិត្ត។ ចំណែកអាវត្រូវ បើកកធំ ឬស្មាតូចតាមការចូលចិត្ត និងការពេញនិយមទៅតាមសម័យរបស់ខ្លួន។ មានអ្នកខ្លះគេកាត់អាវគ្មានស្មាភ្ជាប់ នឹងសំពត់វែង រហូតដល់កែងជើងតែម្តង ហើយប្រើក្រម៉ាស្តើងដែលមានពណ៌ខ្ចីជាងសំពត់ ឬអាវបន្តិចដណ្ដប់ពីលើក៏ម្យ៉ាង ដែរ។ សំលៀកបំពាក់នេះត្រូវប្រើទៅតាមពណ៌ថ្ងៃ និងស្បែកជើងត្រូវប្រើកែងខ្ពស់។
សំលៀកបំពាក់ថ្ងៃធម្មតាពេលព្រឹកត្រូវប្រើអាវបើកក ឬក៏អាវកជិតមានដៃ។ សំពត់ត្រូវស្លៀកខ្លី រើសយកសំពត់ដែលមានពណ៌ស្រគាំ (ក្រម៉ៅ)។ ពេលល្ងាចត្រូវប្រើអាវដៃខ្លី កធំ កមូល ឬកជ្រុងតាមការចូលចិត្តរបស់ម្នាក់ៗ។ ការប្រើក្រណាត់ត្រូវរើសទៅតាមរដូវមិន គួរយកអាវនីឡុងមកពាក់នៅរដូវក្តៅទេ ដែលជាហេតុបណ្ដាលឲ្យស្ទះខ្យល់ចេញចូលអាចបង្កើតទៅជារោគខ្យល់ចាប់។
ុការស្លៀកពាក់នៅផ្ទះសំលៀកបំពាក់បែបនេះមានដូចជាសារុង និងពាក់អាវសង្រែកជាដើម ដែលសំលៀកបំពាក់បែបនេះស្លៀកបានតែនៅក្នុង ផ្ទះប៉ុណ្ណោះ កុំគប្បីចេញមកក្រៅរបង ឬឈរតាមផ្លូវមុខផ្ទះ ឬដើរលំហែរហេតរហូតតាមមាត់ទន្លេ និងទីកន្លែងផ្សេងៗ នោះឡើយ។ បើកំពុងស្លៀកពាក់បែបនេះប្រកបការងារនៅផ្ទះ ហើយមានភ្ញៀវចម្លែកមកលេង មុននឹងទៅទទួលគេ សូមយកអាវក្រៅមកពាក់ជាមុនសិន ព្រោះបើទទួលភ្ញៀវទាំងសំលៀកបំពាក់ដដែលនោះ នឹងនាំឲ្យខូចចរិយាថ្លៃថ្នូររបស់ ស្ត្រី ហើយអាចឲ្យភ្ញៀវសំគាល់មកលើយើងថា ជាមនុស្សខ្ជីខ្ជាខ្វះសុជីវធម៌ក្នុងការស្លៀកពាក់។
ុពណ៌ប្រើប្រចាំថ្ងៃ
ការស្លៀកពាក់ប្រចាំថ្ងៃមិនមែនយើងត្រូវស្លៀកពាក់តាមចិត្តរបស់យើងនោះទេ ដើម្បីឲ្យមានសោភ័ណ្ឌភាពយុវនារីត្រូវធ្វើ ការជ្រើសរើសពណ៌ឲ្យបានត្រឹមត្រូវតាមថ្ងៃដូចជា៖ ថ្ងៃអាទិត្យពណ៌ក្រហមចាស់ ឬខ្ចី ថ្ងៃចន្ទពណ៌លឿងទុំ ថ្ងៃអង្គារពណ៌ ស្វាយ ថ្ងៃពុធពណ៌ស៊ីលៀប ថ្ងៃព្រហស្បត្តិ៍ពណ៌បៃតង ឬត្រួយចេកខ្ចី ថ្ងៃសុក្រពណ៌ខៀវ និងថ្ងៃសៅរ៍ពណ៌ព្រីងទុំ (ពណ៌ និល)។
Article Source: ការិយាល័យព័ត៌មានកាតូលិក កម្ពុជា
|
Print this page
Reflection #509