|
អគារថ្មី ក្តីសង្ឃឹមថ្មី
Posted: 1st May 2007
|
ភ្នំពេញ (C.S.C)៖ ក្រោមអធិបតីភាពព្រះអម្ចាស់ក្សត្រីស៊ីសុវត្ថិពង្សនារី មុនីពង្ស ព្រះរាជតំណាងដ៏ខ្ពង់ខ្ពស់នៃព្រះករុណាព្រះ បាទនរោត្តម សីហមុនី ឯកឧត្តម លោកជំទាវ លោកអភិបាលភូមិភាគភ្នំពេញ លោកបូជាចារ្យ បងស្រី សិស្សានុសិស្ស អាណាព្យាបាល និងភ្ញៀវកិត្តិយសជាច្រើនរូបប្រមាណជាជាង៣០០នាក់ បានចូលរួមក្នុងពិធីសម្ពោធ អគារសិក្សាថ្មីមួយខ្នងដ៏ស្កឹមស្កៃ កំពស់ពីរជាន់ មានបន្ទប់រៀនចំនួន១២ បន្ទប់វិទ្យាសាស្ត្រ បន្ទប់បណ្ណាល័យ បន្ទប់ហាត់របាំនិងមើលវីដេអូ បន្ទប់ញាំបាយ និងបន្ទប់ផ្សេងៗជាច្រើនទៀតគិតចាប់ពីឆ្នាំ២០០៤មក ដែលចំណាយថវិការអស់៤១ម៉ឺន ៤៥២៥ដុល្លារ នៅសាលាដុនបូស្កូទឹកថ្លាកាលពីថ្ងៃ ពី២៦ មេសា ឆ្នាំ២០០៧។
បន្ទាប់ពីពិធីគោរពទង់ជាតិ និងរាំរបាំជូនពរពីសំណាក់សិស្សបឋមសិក្សា តំណាងសិស្សនៃសាលាដុន បូស្កូទឹកថ្លាបានឡើងថ្លែងសុន្ទរកថាស្វាគមន៍ និងអរគុណចំពោះម្ចាស់ជំនួយ និងភ្ញៀវចូលរួមទាំងអស់។ កុមារី សុជាតាបានឲ្យដឹងថា កន្លែងនេះគឺជាកន្លែងមួយដែលមានតម្លៃ និងជាកន្លែងអប់រំមួយដ៏ពេញលេញបំផុតនាពេល អនាគត។ សុជាតាបន្តថា យើងទាំងអស់គ្នានឹងធ្វើខ្លួនឲ្យក្លាយជាសិស្សល្អ កូនល្អ និងមិត្តល្អនៅក្នុងសង្គម ដែលនេះ ជាក្តីប៉ងប្រាថ្នារបស់អាណាព្យាបាលគ្រប់រូប។ នាឱកាសនោះដែរ បងស្រីតេរេសា ទួរអឡេ នាយិកាសាលា បានឡើងថ្លែងរបាយការណ៍នៃសាលាដុនបូស្កូថា ដោយមើលឃើញពីការកើតឡើងនូវតំរូវការជំនាញសំរាប់ស្ត្រី និងចូលរួមការពារការរីករាលដាលនូវស្ត្រីពេស្យា ក្នុងចំណោមក្មេងស្រីដែលមិនបានចូលសាលា យើងបានសំរេចចិត្តបង្កើតមណ្ឌលបណ្ដុះបណ្ដាលវិជ្ជាជីវៈនៅសាលា ដុនបូស្កូទឹកថ្លានៅឆ្នាំ១៩៩៧។ បងស្រីបន្ថែមដោយចិត្តមុះមុតនៅក្នុងអង្គពិធីទៀតថា៖ "យើងខ្ញុំជាបងស្រីសាលេស៊ានដុនបូស្កូទូទាំងពិភពលោក ជាបេសកជនដែលធ្វើការបណ្ដុះបណ្ដាលលើវិស័យអប់រំកុមារ និងយុវជន ជាពិសេស យុវនារីក្រីក្រ ដែលជាជំរើសមុនគេរបស់យើងខ្ញុំ"។ កំពុងអង្គុយសំលឹងមើលក្មេងៗ និងមានមនុស្សម្នាដើរកាត់ ជាច្រើន លោកតា អ៊ុក សាខុន អាយុ៧០ឆ្នាំ ជាមន្ត្រីចូល និវត្តន៍ មានចៅចំនួន៣នាក់កំពុងសិក្សានៅទីនេះបានមានប្រសាសន៍ថា៖ "ខ្ញុំមានការត្រេកអរចំពោះសាលា នេះ ព្រោះសាលាមានការអធ្យាស្រ័យច្រើនចំពោះសិស្សក្រីក្រ អ្នកដែលគ្មានលទ្ឋភាព ឬមានលទ្ឋភាពតិចតួច ដែល សាលានៅតែទទួលឲ្យនៅរៀន"។ លោកបន្ថែមថា នៅសាលានេះមានការរៀបចំ និងអប់រំមនុស្សបានល្អ ប្រសិនបើ កូនសិស្សយកវិន័យសាលាជាគោលនោះ នៅថ្ងៃអនាគតលោកសង្ឃឹមថា ក្មេងៗនឹងជៀសផុតពីអំពើអបាយមុខ ពោរពេញដោយមនុស្សល្អ ពេលនោះប្រទេសជាតិយើងនឹងមានការរីកចំរើន។ ជាមួយគ្នានេះដែរអ្នកគ្រូ អូម រម្យនីមានចំណាប់អារម្មណ៍ថា៖ "ខ្ញុំ មានការសប្បាយចិត្តដោយឃើញសាលានេះ សម្ពោធនូវអគារថ្មី ហើយខ្ញុំសង្ឃឹមថា អនាគតទៅកូនខ្មែរយើងភាគច្រើននឹងបានសិក្សានៅសាលានេះគ្រប់ៗគ្នា។ ហើយនៅពេលដែលពួកគេធំឡើង ពួកគេនឹងមានចំណេះដឹងល្អ
និងអាចជួយដល់ប្រទេសជាតិ ព្រោះពួកគេជាទំពាំង ស្នងឬស្សី។ ប៉ុន្តែអ្នកគ្រូហាក់ដូចជាមានការព្រួយបារម្ភចំពោះអនាគតពួកគេ ប្រសិនបើពួកគេមិនមានលទ្ឋភាព រៀន មានន័យថា ពួកគេនឹងក្លាយទៅជាមនុស្សអវិជ្ជា ហើយភាគច្រើនពួកគេនឹងទៅជួយឪពុកម្តាយរបស់ពួក ធ្វើការងារផ្សេងៗជាដើម។ ពេលនោះចំណេះវិជ្ជាគេក៏គ្មាន ដែលនាំឲ្យអនាគតប្រទេសជាតិក៏មិនបានល្អដែរ។ ព្រះមហាក្សត្រីស៊ីសុវត្ថិ ពង្សនារី មុនីពង្សបានមានបន្ទូលទៅកាន់ភ្ញៀងទាំងអស់ដោយព្រះភ័ក្រញញឹមថា៖ "ខ្ញុំសូម ថ្លែងអំណរគុណយ៉ាងជ្រៀលជ្រៅចំពោះសាលាដែលបានយកចិត្តទុកដាក់ផ្តល់ការអប់រំចំពោះកុមារាកុមារីយ៉ាងអស់ពីកំលាំងកាយចិត្ត"។ បន្ទាប់ពីបញ្ចប់ការសំណេះសំណាលជាមួយអ្នកចូលរួមទាំងអស់ ព្រះមហាក្សត្រីស៊ីសុវត្ថិ ពង្សនារី មុនីពង្សបានយាងទតអាគារ និងកាត់ខ្សែបូសម្ពោធបើកឲ្យប្រើប្រាស់ចាប់ពីពេលនោះតទៅ ជាមួយនឹង ស្នូរទះដៃក្នុងទិដ្ឋភាពប្រកបដោយភាពរីករាយបំផុត។
Article Source: ការិយាល័យផ្សព្វផ្សាយព័ត៌មានព្រះសហគមន៍កាតូលិក
|
Print this page
News #439