|
ភ្នំពេញ៖ ៨២ នាក់ត្រៀមខ្លួន ទទួលជីវិតថ្មី
Posted: 26th February 2007
លោកអភិបាលទទូលអ្នកជំហានទី២
|
ភ្នំពេញ (C.S.C)៖ បងប្អូនស្វែងរកចំនួន ៨២នាក់មកពីព្រះសហគមន៍ចំនួន ៦កន្លែង ក្នុងភូមិភាគភ្នំពេញ បានទទួលពិធី ត្រាស់ហៅយ៉ាងឱឡារិក ដោយលោក អភិបាលភូមិភាគនេះ អេមីល ដេតម្ប កាល់ពីថ្ងៃអាទិត្យទី ២៥ ខែកុម្ភៈកន្លទៅនេះ។ នៅក្នុងពិធីមហាឧឡារិកនេះ លោកអភិបាលអេមីល ដេតម្ប បានមាន ប្រសាសន៍ទៅកាន់អង្គពិធីថា "ថ្ងៃនេះព្រះសហគមន៍មានសេចក្តីរីករាយទទួលប្អូនចំនួន ៨២នាក់ ដែលស្មគ្រចិត្តទទួលព្រះយេស៊ូ "។ លោកអភិបាលបានប្រសាសន៍បន្តទៀតថា ៨២ នាក់ជាចំនួនមួយ យ៉ាងច្រើន បើប្រៀបធៀបទៅនឹងព្រះសហគមន៍តូចៗ។ នៅក្នុងរយៈពេល ៤០ថ្ងៃនៃរដូវអប់រំ ពិសេសនេះ ប្អូនៗត្រូវកែប្រែចិត្តគំនិត ត្រៀមខ្លួនទទួលជីវិតថ្មី ក្នុងឱកាសបុណ្យ ចម្លងខាងមុខនេះ។
ចំពោះគ្រិស្តបរិស័ទចាស់ៗលោកបានធ្វើ ការផ្តាំផ្ញើដែរថា ត្រូវធ្វើជាគំរូ ជួយណែនាំ ប្អូនៗឲ្យ ចេះរស់នៅតាមព្រះបន្ទូលរបស់ ព្រះជាម្ចាស់ផងដែរ។
បងប្អូនថ្មីទាំងនេះ បានចំនាយពេលវេលាជាយូរមកហើយ ដោយបានខិតខំក្នុងការស្វែងយល់រួម ជាមួយលោកគ្រូ អ្នកគ្រូ អ្នកណែនាំជំនឿ ចូលរួមក្នុងសកម្មភាពព្រះសហគមន៍ រួមគ្នាស្តាប់ព្រះបន្ទូល អធិដ្ឋាន ចូលរួមអភិបូជាក្នុងព្រះសហគមន៍ជាដើម។ នេះជាអំណះអំណាងរបស់អ្នកណែនាំក្រុមទាំង ៦ព្រះសហគមន៍ ចំពោះមុខលោកអភិបាល និងគ្រិស្តបរិស័ទដែលចូលរួម ក្នុងពិធីប្រហែល ជាជាង៦០០នាក់។
នៅក្នុងពិធីសំណេះសំណាល កញ្ញាសុភាព មកពីព្រះសហគមន៍បឹងទំពុនបានឡើងចាប់អារម្មណ៍ថា នាងមានចិត្តត្រេកអរណាស់ ដែលនឹងកើតជាថ្មីក្នុងពេលខាងមុខម្តងទៀតរួមជាមួយព្រះយេស៊ូ ជាពេលវេលាដែលនាងទន្ទឹងរង់ចាំជាយូរមកហើយនេះ។ នាងក៏សូមបងប្អូនទាំងអស់អធិដ្ឋានសំរាប់ បងប្អូនថ្មី ក្នុងដំណើររួមជាមួយព្រះយេស៊ូជាអម្ចាស់ជាយើង។
លោកអភិបាលបានធ្វើការផ្តាំផ្ញើម្តងទៀត នៅក្នុងរដូវអប់រំពិសេស ៤០ថ្ងៃនេះ សូមឲ្យបងប្អូនយក ចិត្តទុកដាក់ កែប្រែចិត្តគំនិត រៀបចំខ្លួន ឲ្យបានសមរម្យដើម្បីទទួលជីវិតថ្មី តាមរយៈ អគ្គសញ្ញាជ្រមុជទឹក ក្នុងឱកាសបុណ្យព្រះយេស៊ូដែលមានព្រះជន្មរស់ ឡើងវិញដ៏រុរឿង ខាងមុខនេះ។
Article Source: ការិយាល័យពត៌មាន កាតូលិក កម្ពុជា
|
Print this page
Diocese of Phnom Penh - Article #419