|
សកម្មភាពព្រះសហគមន៍ធ្វើឡើងមិនមែនចង់ល្បីឈ្មោះនោះឡើយ
Posted: 3rd January 2007
សកម្មភាពចែកអំណោយដល់អ្នកេទោស
|
កំពត (CSC) ៖ ចំរឹងដែកធំៗហ៊ុំព័ទ្ឋដោយបន្លាលួសពីរជាន់កំពស់ជាងពីរម៉ែតពីដី ដែលមើលទៅគួរឲ្យស្ញើបបំផុត។ បើចូលទៅខាងក្នុង យើងឃើញមានអគារ៥ខ្នងដែលក្នុងនោះមានចែកជាបន្ទប់តូចៗពីរបីទៀត។ មនុស្សជាច្រើនស្លៀកសំលៀកបំអាវខៀវចំក្រណាត់ពណ៌សរនៅជាយៗ ដែលកំពុងអើតមើលពីចន្លោះទ្វារ និងបង្អួចបន្ទប់។ បន្តិចក្រោយមកមានបុរសម្នាក់មានមុខមាំ បំពាក់ខោអាវជាប៉ូលីស បើកទ្វារបញ្ជាឲ្យ អ្នកទាំងនោះមកខាងក្រៅ " នែ៎! ចេញមកឲ្យឆាប់ៗ! "។
បើយើងបែរទៅមើលនៅក្លោងទ្វារនៃកន្លែងនោះវិញ គេសរសេរឈ្មោះថាពន្ឋនាគារ ខេត្តកំពត។ ហើយកាលពីថ្ងៃទី២០ ខែធ្នូថ្មីៗនេះ ព្រះសហគមន៍កំពតបានសុំ ការអនុញ្ញាតពីក្រសួងមហាផ្ទៃនិងប្រធានពន្ឋនាគារទូទាំងប្រទេស ដើម្បីចូលសួរសុខទុក្ខ និងចែកអំណោយខ្លះៗ ដល់ទណ្ឌិតចំនួន២៣០នាក់ដែលមានស្ត្រី១៣នាក់នៅពន្ឋនាគារ ខេត្តកំពត។ កម្មវិធីនោះ ដឹកនាំដោយ លោកបូជាចារ្យ អូលីវីយ៉េ និងលោកបូជាចារ្យ សួន ហង្សលី រួមនឹងបងស្រី២នាក់ និងមានការចូលរួមពីយុវជន កាតូលិក៩នាក់។
មុនពេលចែកអំណោយលោកបូជាចារ្យសួន ហង្សលី បានមានប្រសាសន៍ថា៖ "ព្រឹកនេះយើងទាំងអស់គ្នា តំណាងឲ្យព្រះសហគមន៍កាតូលិកមានអំណរសប្បាយក្នុងឱកាសបុណ្យព្រះយេស៊ូ ប្រសូត ហើយពួកយើងចង់ចែក រំលែកនូវអំណរសប្បាយនេះទៅដល់បងប្អូនទាំងអស់គ្នាដែរ។"
អំណោយដែលបាន ចែកនោះរួមមាន មីកញ្ចប់ ម្សៅសាប៊ូ សាប៊ូដុសខ្លួន ថ្នាំនិងច្រាសដុសធ្មេញ ហើយនិងមានញុំអាហារផងដែរ ដែលសរុបជាទឹកប្រាក់អស់ជិត១០០០ដុល្លាអាមេរិក។ លោកបូជាចារ្យអូលីវីយ៉េ បានប្រាប់ឲ្យដឹងថា "អ្វីដែលយើងធ្វើទាំង អស់នេះ គឺយើងចង់ឲ្យព្រះសហគមន៍ កាតូលិកមានវត្តមាននៅក្នុង ខេត្តកំពត ព្រោះនៅទីនេះមិនមានគ្រីស្តបរិស័ទកាតូលិក។ ទាំងនេះមិនមានន័យថា យើងចង់ល្បីឈ្មោះឡើយ"។ លោកបានបន្តទៀតថា យើងធ្វើការទាំងនេះ ដើម្បីបង្ហាញថា ព្រះជាម្ចាស់មានធម៌មេត្តាករុណាចំពោះមនុស្ស ទាំងអស់ ទាំងអ្នកបាប អ្នកតូចតាច និងមនុស្សគ្រប់វណ្ណៈ។
គួររំឭកដែរថា កម្មវិធី សួរសុខទុក្ខនិងចែកអំណោយដល់ទណ្ឌិតក្នុងពន្ឋនាគារខេត្តកំពតធ្វើក្នុង១ឆ្នាំម្តង ក្នុងឱកាសបុណ្យព្រះយេស៊ូប្រសូតដែលចាប់ផ្តើមធ្វើពីឆ្នាំ ២០០៤មក។ ក្នុងកាយវិការស្ងប់ស្ងាត់តំរង់ជាជួរ តាមលេខរៀង ដោយឆ្លើយថា "បាទ លោកនាយ!" ។ តាមការសង្កេត យើងឃើញថា នៅទីនោះមានយុវជន ក្មេងៗជាច្រើននាក់ ដែលមានអាយុក្រោម៣០ឆ្នាំ។
ពួកគេចោលភ្នែកមើលមកយើងតែមិនហ៊ាននិយាយអ្វីឡើយ។ ភោគ ជាយុវជនកាតូលិកដែលបានចូលរួមជួយចែកអំណោយនិយាយថា " ខ្ញុំមានអារម្មណ៍រំភើបណាស់ ដោយសារពេលឃើញ ស្ត្រីទណ្ឌិតទាំងនោះ សំរក់ទឹកភ្នែកគ្រាដែលយើងយកអាហារនិងអំណោយដល់ពួកគាត់។" លោក កែវ ភោគ បន្តទៀតថា "កាលពីមុនខ្ញុំតែងគិតថា ពួកគេជាមនុស្សមិនល្អ សម្លាប់មនុស្ស ធ្វើឲ្យសង្គមមានបញ្ហា តែពេលដែលគាត់ បានឃើញពួកគេក្នុងសភាពបែបនេះ អ្វីដែលខ្ញុំគិតពីមុនមិនដឹងជាបាត់ទៅណាអស់ទេ"។
ក្រៅពីការសួរសុខទុក្ខទណ្ឌិតក្នុងពន្ឋនាគារព្រះសហគមន៍កំពតក៏មានគំរោងធ្វើសកម្មភាពផ្សេងទៀតដែរ ក្នុងឱកាសបុណ្យព្រះគ្រីស្តប្រសូត ដូចជា ចែកអំណោយដល់ក្មេងៗ៧៥០នាក់នៅចំការទៀង ១០០នាក់នៅគីរីវង្ស (តាកែវ) ១០០នាក់នៅកំពត ១៥០នាក់នៅស្ទឹងមានជ័យ (ភ្នំពេញ) ៥០នាក់នៅភ្នំវល្លិ៍ (កំពត) ចាស់ជរា៥០នាក់នៅគីរីវង្ស (តាកែវ) និងគ្រួសារក្រីក្រ១៥០គ្រួសារនៅចំការទៀង (តាកែវ)។
Article Source: ការិយាល័យពត៌មាន កាតូលិក កម្ពុជា
|
Print this page
Diocese of Phnom Penh - Article #380