|
មណ្ឌលនិស្សិតកាតូលិកកម្ពុជាទទួលសិស្សថ្មី
Posted: 15th October 2006
និស្សិតថ្មីប្រលងចូលមណ្្ឌល
|
ភ្នំពេញ (C.S.C)៖ មណ្ឌលនិស្សិតកាតូលិកកម្ពុជា ចាប់ផ្តើមបង្កើតឡើងនៅឆ្នាំ ១៩៩៨ ដើម្បីជួយដល់យុវជន យុវនារីក្នុង ព្រះសហគមន៍កាតូលិកដែលមានបំណងចង់រៀនបន្តថ្នាក់ឧត្តមនៅមហាវិទ្យាល័យផ្សេងៗ។ ហើយនាពេលថ្មីៗនេះ បានជ្រើសរើសនិស្សិតពីភូមិភាគទាំងបីនៃព្រះសហគមន៍កាតូលិកចំនួន១២ នាក់កាលពីថ្ងៃសុក្រ ទី ០៧ កន្លងទៅ។ មណ្ឌលនិស្សិតផ្តល់ ការស្នាក់នៅ អាហារ និងថ្លៃសិក្សាដល់និស្សិតទាំងអស់រយៈពេលបួនឆ្នាំ។ ប៉ុន្តែយុវជនទាំងនោះ ត្រូវបង់ប្រាក់ជា ប្រចាំខែតាមកំរិតជីវភាពគ្រួសារក្នុងម្នាក់ ១២-១៥-២០ ដុល្លារ ដើម្បីជួយចំណាយផ្សេងៗ នៃការស្នាក់នៅ។
លោកបូជាចារ្យ អេនរីកូជាអ្នកទទួលខុសត្រូវមណ្ឌលនិស្សិត បានអោយដឹងថាបានឲ្យដឹងថា "ចំពោះនិស្សិតដែលរៀនរយៈពេលលើសពី ៤ ឆ្នាំ យើងនៅតែបន្ត ជួយឧបត្ថម្ភថ្លៃបង់សាលា ប៉ុន្តែពួកគេត្រូវជួលផ្ទះនៅខាងក្រៅដោយខ្លួនឯង។ ប្រសិនបើពួកគេរៀនត្រួតឆ្នាំវិញ មណ្ឌលសុំផ្តាច់អាហាររូបករណ៍តែម្តង"។
ទើបតែប្រលងចប់សំនួរសរសេរ ឆេង ម៉ាប់ មកពីព្រះសហគមន៍តាពូង នៃខេត្តបាត់ដំបង សង្ឃឹមថានៅពេលប្រលងជាប់ ហើយរកការងារធ្វើបាន គាត់នឹងជួយប្អូនៗជំនាន់ក្រោយឲ្យបានរៀនដូចគាត់។ លក្ខខណ្ឌដែលអាចស្នាក់នៅ និងទទួលអាហារូបករណ៍នេះបាន លុះត្រាតែ យុវជនមាន ទំនាក់ទំនងជាមួយគណកម្មាការក្នុងព្រះសហគមន៍កាតូលិក ជានិស្សិតក្រីក្រ និងមានសមត្ថភាពអាចរៀននៅមហាវិទ្យាល័យបាន។
រួមជាមួយគ្នានោះផងដែរ ក៏មានធ្វើសំភាស និងសំនួរសរសេរលើមុខវិជ្ជា គណិតវិទ្យា រូបវិទ្យា អក្សរសាស្ត្រ គីមីវិទ្យា ភាសាអង់គ្លេស និងវប្បធម៌ទូទៅ។ ក្នុងឆ្នាំនេះ មណ្ឌលនិស្សិតកាតូលិកមាននិស្សិតចំនួន ៥៥ នាក់ដែលក្នុងនោះមានស្រ្តី ២៧ នាក់ និងមានមណ្ឌលថ្មីមួយទៀត (សំរាប់និស្សិតស្រី) នៅឯទួលគោកមាននិស្សិតស្រីចំនួន ១៥ នាក់ហើយ ដែលសរុបការចំណាយជាប្រចាំឆ្នាំប្រមាណជា ៨ ម៉ឺនដុល្លាអាមេរិក។
Article Source: ការិយាល័យផ្សព្វផ្សាយព័ត៌មានព្រះសហគមន៍កាតូលិក កម្ពុជា
|
Print this page
News #335