|
កំពង់ធំ ពិធីសម្ភោធព្រះវិហារព្រែកស្បូវ
Posted: 16th June 2006
អាគារព្រះវិហារថ្មីនៅព្រែកស្បូវ កំពង់ធំ
|
ភ្នំពេញ (C.S.C)៖ កាលពីថ្ងៃទី ១១ មិថុនា ឆ្នាំ ២០០៦ កន្លងទៅនេះនៅព្រះសហគមន៍ព្រែកស្បូវ ស្ថិតនៅខេត្តកំពង់ធំនៃ ភូមិភាគបាត់ដំបង មានរៀបចំពិធីសម្ពោធព្រះវិហារថ្មីមួយធ្វើអំពីថ្មលាយឈើ ក្រោមការឧបត្ថម្ភអំពីសម្តេចប៉ាបបេណេឌីកតូ ទី ១៦ គ្រីស្តបរិស័ទពីប្រទេសជប៉ុន និងការរៃអង្គាសពីបងប្អូនគ្រីស្តបរិស័ទ បងប្អូនពុទ្ឋបរិស័ទ នៅក្នុងភូមិព្រែកស្បូវ ដែលសរុបជាថវិការចំនួន ១៣.៣០៣ដូល្លារអាមេរិក។
ពិធីនេះប្រព្រឹត្តទៅក្រោមអធិបតីភាពរបស់លោកអភិបាល គីគេ ហ្វីហ្គារេដូ ជាអភិបាលភូមិភាគបាត់ដំបង ដោយរួមមានបងប្អូនគ្រីស្តបរិស័ទមកពីព្រះសហគមន៍នានាជាច្រើនដូចជា ព្រះសហគមន៍សៀមរាប ព្រះសហគមន៍ស្វាយស៊ីសុផុនជាដើម និងមានពុទ្ឋបរិស័ទនៅក្នុងភូមិព្រែកស្បូវទាំងចាស់ទាំងក្មេងចូលរួមយ៉ាងច្រើនកុះករផងដែរ។
តាមប្រសាសន៍របស់លោកបូជាចារ្យ ង៉ែត វិន័យ ជាអ្នកទទួលខុសត្រូវនៅព្រះសហគមន៍ព្រែកស្បូវបានមានប្រសាសន៍ឲ្យដឹងថា៖ "តាមពិតខ្ញុំគិតថាមិនចង់ឲ្យមានព្រះវិហារទៀតទេ ដោយសារតែនៅជិតភូមិព្រែកស្បូវមានព្រះវិហារធំ មួយនៅកំពង់រទេះរួចហើយ ក៏ប៉ុន្តែគ្រីស្តបរិស័ទនៅទីនេះ គេមិនព្រមដោយសំអាងថា ក្រោយសម័យសង្គ្រាមប្រល័យពូជសាសន៍ ព្រះសហគមន៍ដែលកើតមុនគេនៅកំពង់ធំ គឺព្រះសហគមន៍ព្រែកស្បូវនេះ។ ហើយបើចង់ឲ្យគេទៅព្រះសហគមន៍ផ្សេងទៀត គឺគេប្រកែកមិនព្រមទៅទេ ដោយមូលហេតុទាំងនេះហើយបានជាឆ្នាំនេះមានព្រះវិហារថ្មីនៅទីនេះ"។ លោកបានបន្តទៀតថា បីឆ្នាំកន្លងមកនេះ បងប្អូនគ្រីស្តបរិស័ទ និងពុទ្ឋបរិស័ទនៅទីនេះ គេនាំគ្នារៃអង្គាស ប្រាក់ក្នុងមួយគ្រួសារខ្លះ ៥.០០០ រៀល ខ្លះ ១០.០០០ រៀល ខ្លះ២០.០០០ រៀល ទៅតាមលទ្ធភាពគ្រួសារនីមួយៗ មិនតែប៉ុណ្ណោះពួកគេក៏បានចូលរួមជួយជាកំលាំង ដូចជាជួយចាក់ដី ធ្វើឃឿនព្រះវិហារ និងលាងក្បឿងជាដើម។
ក្នុងសំលៀកបំពាក់អាវចំរុះពណ៌ សំពត់បត់ សក់ប្រះស្មា លោកយាយភាច យឹង ជាគ្រីស្តបរិស័ទយូរយារ ណាស់មកហើយបានមានប្រសាសន៍ទាំងលើកដៃប្រណមឡើងព្រមជាមួយពាក្យអរព្រះគុណព្រះជាម្ចាស់ផងថា៖ "ខ្ញុំមានអំណរសប្បាយរីករាយមែនទែន ខ្ញុំមិនដែលបានព្រះវិហារប៉ុណ្ណេះ តែព្រះអង្គប្រទានឲ្យមានព្រះវិហារនេះ។ សូមព្រះអង្គជួយថែរក្សាអ្នកគ្រប់គ្នាគ្រប់ទីកន្លែង"។
កំពុងមមារញឹករត់ទៅនេះបន្តិចទៅទីនោះបន្តិច ដើម្បីអញ្ជើញភ្ញៀវឲ្យចូលរួមពិសារអាហារ លោកសយ រិន ជាគណកម្មាការព្រះសហគមន៍ព្រែកស្បូវ បានរៀបរាប់ប្រាប់ពីផលលំបាករបស់ព្រះសហគមន៍នៅទីនេះតាំងពីក្រោយរបបប្រល័យពូជសាសន៍យ៉ាងនេះថា បងប្អូនគ្រីស្តបរិស័ទអត់ហ៊ានទៅស្រុកទៅភូមិ ពីព្រោះខ្មែរក្រហមនៅពាសវាលពាសកាលដេញបាញ់គ្នា អញ្ចឹញបងប្អូនចេះតែរត់មកនៅទីរួមខេត្ត ហើយក៏នាំគ្នាទៅជួបលោកតាវ៉ានេ និងលោកអភិបាលអេមីល ដេតម្ប។ ពួកគាត់ក៏ឲ្យបងប្អូនបង្កើតជាព្រះសហគមន៍ឡើញវិញ។ លោកសយ រិន បន្តទាំងភ្នែកសំលឹងមើលទៅទីផ្សេង ហាក់ដូចជាស្រមៃអំពីអតីតកាលដែលបានកើតមាន ដោយបន្តថា៖ "ខ្ញុំក៏នាំបងប្អូនអធិដ្ឋាន តាមផ្ទះពេលនោះភ័យផងខ្លាចផង ព្រោះពួកពុលពតគេនៅជិតៗ គេដេញបាញ់គ្នា អញ្ជឹញមិនហ៊ានធ្វើអីទូលំទូលាយទេ"។ ពួកលោកនាំគ្នាអធិដ្ឋានតាមរបៀបស្ងាត់ៗ ដែលមាននគរបាលចុះត្រួតពិនិត្យគ្រប់ពេល។ លុះដល់ពេលក្រោយមកពួកគេក៏ឈប់តាមដានដោយសារ លោកបូជាចារ្យធ្វើបុណ្យ អានព្រះគម្ពីរ និងមានការណែនាំគ្រីស្តបរិស័ទឲ្យប្រព្រឹត្តតែអំពើល្អ។ ពួកគេក៏អនុញ្ញាតិឲ្យពួកយើងសាងព្រះវិហារតូចមួយរហូតមកដល់ពេលនេះ យើងមានព្រះវិហារថ្មីហើយ"។
ក្នុងថ្ងៃដ៏សែនសប្បាយនោះដែរ ក៏មានរៀបចំពីធីបុណ្យលាបថ្ងាសលើកទីមួយក្នុងព្រះវិហារថ្មី ដែលមានយុវជនចំនួន១៦នាក់ មកពីព្រះសហគមន៍សៀមរាប និងព្រះសហគមន៍នៅព្រែកស្បូវ។
យុវតី ចាន់ទី រៀននៅ ថ្នាក់ទី ៨ ជាគ្រីស្តបរិស័ទថ្មីមកពីខេត្តសៀមរាប ដែលមានឪពុកម្តាយជាពុទ្ធបរិស័ទបានប្រាប់ថា ដំបូងនាងមកតាមមិត្តរបស់នាងដែលនៅក្បែរខាងរបស់នាង ចូលរួមរៀនអប់រំជំនឿ ហើយយូរៗទៅនាងយល់ឃើញថាល្អ ចំណែកឪពុកម្តាយរបស់នាងក៏មិនមានការប្រឆាំងជាមួយនាងដែរ។ នាងបាននិយាយថា៖ "ពួកគាត់អត់មានបញ្ហាទេ គឺគាត់តាមចិត្តរបស់ខ្ញុំ ហើយម្យ៉ាងទៀតគាត់ចូលរួមត្រេកអរ ដែលខ្ញុំបានចូលជាគ្រីស្តបរិស័ទហើយគាត់ពេញចិត្តឲ្យខ្ញុំចូល ដោយសារគាត់ផ្តល់សេរីភាពដល់កូនធ្វើអ្វីក៏បានដែរឲ្យតែសមស្រប"។
Article Source: ការិយាល័យផ្សព្វផ្សាយព័ត៌មានកាតូលិក ភ្នំពេញ
|
News #294