|
មិថុនាទិវាកុមារអន្តរជាតិ ១ មិថុនា
Posted: 14th June 2006
កុមារមានសិទ្ធិក្នុងការអភិវឌ្ឍន៍
|
ភ្នំពេញ (C.S.C)៖ កុមារប្រមាណជាជាង ៣០០ នាក់បានមកជួបជុំគ្នានៅក្នុងមណ្ឌលមួយរបស់អង្គការម៉ារីណុលនាព្រឹកថ្ងៃទី ១ មិថុនា ២០០៦ ដែលជាថ្ងៃទិវាសិទ្ធិកុមារអន្តរជាតិ និងជាលើកទី ៤ សំរាប់ពិធីនេះដែរ។
ក្នុងទិវានេះដែរមានការចូលរួមពីលោកបូជាចារ្យ ជីម ណូណាន់ ប្រធានអង្គការម៉ារី ណុល លោកគ្រូ អ្នកគ្រូ សិស្សានុសិស្ស ដែលពួកគេជាក្មេងកំព្រាដូចជា កំព្រាឪពុក ឬម្តាយ ឬកំព្រាទាំងឪពុក និងម្តាយ ដោយពួកគេរស់នៅជាមួយជីដូនជីតា ឬមាមីងជាដើម និងការចូលរួមពីអាណាព្យាបាលក្មេងៗទាំងនោះជាច្រើននាក់ទៀតផងដែរ។
នៅក្រោមសំពត់តង់ពណ៌ខៀវ គ្របដណ្ដប់ ដោយពន្លឺព្រះអាទិត្យចាំងចែងមកពីលើដោយភាពអបអរជាមួយនិងទិវាដ៏មហាអស្ចារ្យនេះដែរ។ ជាមួយនិងសំលៀកបំពាក់ អាវយឺតខៀវ សំពត់ជរជើងយ៉ាងស្រស់ស្អាត អ្នកស្រីងួន ផល្លា បុគ្គលិកសង្គមកិច្ចផ្នែកកុមារ ពន្លកនៃក្តីសង្ឃឹមនៃអង្គការម៉ារីណុលបានមានប្រសាសន៍ថា៖ "កម្មវិធីនេះគឺធ្វើឡើងដោយផ្តោតសំខាន់ទៅលើទិវាកុមារ អន្តរជាតិ ១ មិថុនានេះតែម្តង ហើយបញ្ហាដែលសំខាន់នោះគឺចង់បង្ហាញឲ្យគេចងចាំថា កុមារត្រូវមានសិទ្ធិ ដោយសារនៅមានប្រជាជនខ្មែរយើងខ្លះមិនយល់ពីសិទ្ធិកុមារទេ "។
លោកស្រីបន្តថា លោកស្រីមានចំណាប់អារម្មណ៍យ៉ាងខ្លាំងដោយសារនៅថ្ងៃនេះជាថ្ងៃពិសេសរបស់កុមារ ហើយត្រូវចាំថា ក្មេងៗមិនមែនមានសិទ្ធិតែមួយថ្ងៃទេ គឺមានសិទ្ធិរាល់ថ្ងៃ គ្រាន់តែថ្ងៃ ១ មិថុនានេះគេធ្វើដើម្បីរំលឹកឲ្យកុមារដឹងថាគេមាន សិទ្ធិដែរ។
សំលេងចំរៀងរបាំអមដោយអ្នករាំរបាំជូនពរយ៉ាងទន់ល្វត់ល្វន់បានបង្ហាញរូបរាងឡើង ក្រោមក្រសែភ្នែកអ្នកទស្សនាយ៉ាងច្រើនដោយឥតព្រិចភ្នែក។
ក្នុងសំលៀកបំពាក់បែបជាយុវវ័យ កញ្ញា មិនា អាយុ ១៨ ឆ្នាំ បានងាកមករកអ្នកយកព័ត៌មានយើងក្នុងទឹកមុខញញឹមរាក់ទាក់បន្ទាប់ពីក្រុមរបាំបានបញ្ចប់តួនាទីរបស់ខ្លួន។ កញ្ញាស្រស់សោភារូបនេះបានឲ្យដឹងថា៖ "កម្មវិធីអបអរសិទ្ធិកុមារនេះ មានសារៈសំខាន់ណាស់ ដោយសារវាផ្តល់នូវការយល់ដឹងពីសិទ្ធិកុមារកាន់តែច្បាស់លាស់បន្ថែមទៀត ព្រោះកុមារមានសិទ្ធិក្នុងការទាមទារសិទ្ធិរបស់ខ្លួនឯង"។
ជាមួយនឹងភ្នែកសំឡឹងទៅកាន់វេទិការបស់កុមារដែលកំពុងតែលេងសើចយ៉ាងសប្បាយ លោកគ្រូភោគ សុវុទ្ធី ជាអ្នកគ្រប់គ្រងកម្មវិធីកុមារពន្លកនៃក្តីសង្ឃឹមនៃអង្គការម៉ារីណុលបានងាកមកញញឹមដាក់អ្នកយកព័ត៌មានយើងដោយបញ្ចេញនូវចំណាប់ អារម្មណ៍របស់លោកថា "លោកមានអារម្មណ៍សប្បាយរីករាយ ដោយសារពួកគេបានទទួលការអប់រំមានចំណីអាហារគ្រប់ គ្រាន់ និងមានទីជំរកសមរម្យ "។ លោកបន្តថា យើងទុកសេរីភាពសំរាប់ឲ្យឪពុកម្តាយរបស់ក្មេងមានសិទ្ធិជ្រើសរើសយកសាសនាណាក៏ដោយតាមការពេញចិត្តរបស់ពួកគេ ហើយកុមារភាគច្រើនគឺកាន់សាសនាព្រះពុទ្ឋ។
ថ្ងៃនេះគឺជាថ្ងៃមួយដែលពួកគេបានមកចូលរួម ពួកគេមានភាពសប្បាយរីករាយទាំងអស់គ្នា ហើយពួកគេទទួលបានការយល់ដឹង និងបានរំលឹកថាថ្ងៃនេះជាទិវារបស់កុមារ ហើយមិនតែប៉ុណ្ណោះមិនមែនតែពួកគេទេ ដែលដឹង គឺធ្វើឲ្យអ្នកដទៃ ទៀតដឹងថាថ្ងៃនេះជាថ្ងៃពិសេសសំរាប់កុមារផងដែរ។
"ខ្ញុំមានអារម្មណ៍រំភើបដោយអង្គការម៉ារីណុលបានជួយដល់កូនរបស់គាត់ និងបានអញ្ជើញមកចូលរួមនៅក្នុងកម្មវិធីនេះ ដោយមានទឹកចិត្តរំភើបរីករាយនិងមានសេចក្តីសង្ឃឹមថា កូនអាចមានអនាគតភ្លឺស្វាងរហូត"។ នេះជាសំដីពោរពេញដោយក្តីសង្ឃឹមនៅក្នុងចិត្តរបស់លោកម៉ៅ ព្រឿង ដែលជាអាណាព្យាបាលក្មេងរបស់អង្គការម៉ារីណុល។
លោកបូជាចារ្យជីម ណូណាន់ ប្រធានអង្គការម៉ារីណុលក៏បានបង្ហាញពីចំនាប់អារម្មណ៍ ក៏ដូចជាទឹកចិត្តសប្បាយរីករាយ ចំពោះទិវានេះផងដែរ ដោយលោកបានមានប្រសាសន៍ទៅកាន់ភ្ញៀវដែលចូលរួម និងកុមារទាំងអស់ថា៖ "ខ្ញុំមានអារម្មណ៍សប្បាយដោយបានមកចូលរួមនៅក្នុងកម្មវិធីនេះដោយបានឃើញក្មេងៗជាច្រើន ប្រកបដោយទឹកមុខរីករាយក្នុងទិវាសិទ្ធិរបស់ពួកគេ"។
Article Source: ការិយាល័យផ្សព្វផ្សាយព័ត៌មានកាតូលិក កម្ពុជា
|
News #291