|
កម្ពុជា ជំនួបអន្តរសាសនាសម្រាប់មូលដ្ឋានគ្រឹះនៃសីលធម៌
Posted: 29th May 2006
ជំនួបអន្តរសាសនានៃមេដឹកនាំសាសនាធំៗ
|
ភ្នំពេញ (C.S.C) ៖ កាលពីថ្ងៃទី ១៨ មេសា ឆ្នាំ ២០០៦ កន្លងទៅនេះ នៅវិទ្យាស្ថានពុទ្ធសាសនបណ្ឌិត្យ រាជធានីភ្នំពេញ មានរៀបចំការពិភាក្សាតុមូល មួយលើប្រធានបទ "មូលដ្ឋានគ្រឺះនៃសីលធម៌ និងក្រមសីលធម៌សង្គម" ដែលមានការចូលរួមពីមេដឹកនាំ និងអ្នកតំណាងសាសនាធំៗ នៅកម្ពុជាមាន ពុទ្ធសាសនា ឥស្លាមសាសនា និងគ្រីស្តសាសនានិកាយកាតូលិក និងប្រូតេស្តង់។
ការពិភាក្សានេះរៀបចំឡើងដោយមូលនិធិខុនរ៉ាដ អាដិនណូអ៊ែរ អាឡឺម៉ង់ សហការនិងក្រុមប្រឹក្សាអន្តរសាសនាកម្ពុជា។ នៅក្នុង ឱកាសនោះ ភិក្ខុយស ហ៊ុត ខេមចារោ ជាទីប្រឹក្សាក្រុមអន្តរសាសនា មានសង្ឃដីកាថា៖ "នៅក្នុងប្រពៃណីពុទ្ឋសាសនា គឺមានការបង្រៀនឲ្យមនុស្សម្នាក់មានតុល្យភាពខាងក្តីមេត្តាករុណា និងបញ្ញាជាដរាប ដែលយើងត្រូវយកសីលធម៌នេះទៅអនុវត្តជាក់ស្តែងនៅក្នុងជីវិតរស់នៅ"។ ចំណែកឯកឧត្តម ហ្សាការីយ៉ា អាដាម ជាតំណាងនៃសាសនាឥស្លាមបានលើកឡើងដែរថា៖ "ពាក្យថា 'ឥស្លាម ប្រែមកថា ធ្វើឲ្យមានសន្តិភាព'។ ទង្វើណាមួយដែលជនមូស្លីមធ្វើផ្ទុយពីពាក្យនេះ គឺពុំមែនត្រឹមត្រូវទៅតាមអ្វីដែលសាសនាឥស្លាម ចង់បាននោះទេ"។ រីឯលោកបូជាចារ្យ អ៊ុន សុន តំណាងឲ្យព្រះសហគមន៍ កាតូលិកនៅកម្ពុជា មានប្រសាសន៍ថា៖ "គោលបំណងនៃគ្រីស្តសាសនា គឺអប់រំអ្នកជឿឲ្យរស់នៅដោយពឹងផ្អែកលើព្រះបន្ទូល និងធ្វើតាមព្រះហឫទ័យព្រះបិតា គឺស្រលាញ់ព្រះជាម្ចាស់អស់ពី ចិត្តគំនិត និងស្រឡាញ់អ្នកដទៃឲ្យដូចស្រឡាញ់ខ្លួនឯង"។
ជាទីបញ្ចប់លោក លី ធន់ ជាអគ្គលេខាធិការនៃក្រុមប្រឹក្សាអន្តរសាសនា បានកត់សម្គាល់ជាអំពីឥទ្ធិពលនៃសកលភាវូបនីយកម្មដែល កែប្រែផ្នត់គំនិតមនុស្ស ឲ្យផ្តល់តម្លៃហួសហេតុទៅលើសម្ភារៈ នាំឲ្យពួកគេមានការប្រកួតប្រជែង និងមិនចុះសម្រុងគ្នា។ លោកបន្តថា៖ "យើងម្នាក់ៗត្រូវរួបរួមគ្នា និងកុំបន្តុះបង្អាប់វប្បធម៌ដែលមិនមែនជារបស់ខ្លួន"។
Article Source: ការិយាល័យផ្សព្វផ្សាយព័ត៌មានកាតូលិក កម្ពុជា
|
News #290