|
ជំនួបនិស្សិតកាតូលិកកម្ពុជាលើកទី ១ យើងរួមគ្នាជាកម្លាំងព្រះសហគមន៍
Posted: 14th February 2006
និស្សិតពិភាក្សាជាក្រុម
|
ភ្នំពេញ (C.S.C)៖ នៅក្នុងរយៈពេលប៉ុន្មានឆ្នាំចុងក្រោយនេះ ព្រះសហគមន៍កាតូលិកបានយកចិត្តទុកដាក់ទៅលើការអប់រំចំណេះដឹងទូទៅ ចំពោះយុវជន យុវនារីដែលជាកំលាំងស្នូលមួយរបស់ព្រះសហគមន៍នៅពេលបច្ចុប្បន្ន និងអនាគត។ ដោយកសាងជាសាលារៀន និងគ្រិះស្ថានអប់រំ នានានៅតាមតំបន់ ដើម្បីផ្តល់ឱកាសដល់ សិស្សក្រីក្រ ទទួលការអប់រំ និងបន្តការសិក្សាបាន ចាប់ពីថ្នាក់មតេយ្យរហូតដល់សាកលវិទ្យាល័យ ។
កាលពីថ្ងៃទី ៨ ខែ មករា កន្លងទៅ នៅក្នុងទីធ្លារនៃសាលាបច្ចេកទេសដុនបូស្កូទឹកថ្លា មានការជួបជុំគ្នារវាងនិស្សិតព្រះសហគមន៍កាតូលិក ចំនួនប្រមាណជា ១១៥នាក់ ដែលកំពុងបន្តការសិក្សានៅវិទ្យាស្ថាន រឺសាកលវិទ្យាល័យនានា ក្នុងទីក្រុងភ្នំពេញ ដោយស្នាក់នៅទីកន្លែងផ្សេងៗពីគ្នាផងដែរ។ ម្នាក់ៗពោរពេញទៅដោយទឹកមុខរីករាយ ទទួលស្វាគមន៍គ្នាទៅវិញទៅមកដោយក្តីស្រលាញ់រាប់អាន។
នៅតាមផ្លូវចូលមានយុវនិស្សិតបី បួននាក់កំពុងរៀបចំចែកជូននូវផ្លាក់ឈ្មោះដល់យុវនិស្សិតដែលទើបតែមកដល់។ នៅលើផ្លាក់នោះមានសរសេរអក្សរថា៖ "យើងរួមគ្នាជា កំលាំងនៃព្រះសហគមន៍" ដែលជាប្រធានបទសំរាប់ការជួបជុំគ្នានេះ។ ចំណែកនៅជិតក្លោងទ្វារចូលវិញ មានបូជាចារ្យវ័យក្នេងម្នាក់ឈរទទួលស្វាគមន៍និស្សិត ដែលយើងស្គាល់ច្បាល់ គឺលោកឪពុក អេនរីកូ ហ្វីដាន់ហ្សា ដែលជា នាយកគ្រប់គ្រងមណ្ឌលនិស្សិតព្រះសហគមន៍កាតូលិក កម្ពុជា មកពីក្រុមគ្រួសារកាតូលិក ពីមេ (PIME) និងជាអ្នកជួយសំរបសំរួលក្នុងកម្មវិធីជំនួបនិស្សិតនោះផងដែរ។ នៅក្នុង ឱកាសដ៏សប្បាយរីករាយនេះ ក៏មានវត្តមានលោកបូជាចារ្យអាស្លី អេវ៉ាន់ អតីតនាយកគ្រប់គ្រងមណ្ឌលនិស្សិតព្រះសហគមន៍កាតូលិកកម្ពុជា មកពីក្រុមគ្រួសារកាតូលិក សហជីវិនព្រះយេស៊ូ បងស្រី វេនឌី ជំនួយការនាយកនៃមណ្ឌលនិស្សិតព្រះសហគមន៍កាតូលិកនិងក្រុមយុវជន ហ្វីលីពីនមួយចំនួនផងដែរ។
លោកបូជាចារ្យ អេនរីកូ ហ្វីដាន់ហ្សា បានអោយដឹងអំពីមូលហេតុ នៃជំនួបនិស្សិតនេះថា៖ "ដើម្បីអោយគេមានទំនាក់ទំនងគ្នា និងស្គាល់គ្នាទៅវិញ ទៅមក ដោយសារនិស្សិតយើងមកពីព្រះសហគមន៍ផ្សេងៗក្នុងភូមិភាគទាំងបី ខ្លះស្គាល់គ្នាក្នុងមណ្ឌល ខ្លះមិនស្គាល់គ្នាឡើយ ។ ម្យ៉ាងទៀតការជួបជុំ គឺដើម្បីជួយគេអោយរិះគិត អំពីខ្លួនឯងជានិស្សិតកាតូលិកជាមួយ និងសង្គម"។ យុវនិស្សិតផ្នែកទេសចរណ៍ លោកមាក ស៊ន មកពីមណ្ឌល យុវជនយុត្តិធម៌ក្នុងការសិក្សា ដែលបានចូលរួម និងជាអ្នកកាន់កម្មវិធី ក្នុងឱកាសនោះក៏បានលើកហេតុផលស្រដៀង នឹងលោកឪពុកដែរ ដោយបង្ហាញនូវអារម្មណ៍របស់ខ្លួនថា៖ "ពេលយើងជួបគ្នា យើងសិក្សាពីឥរិយាបថគ្នាទៅវិញទៅមក ពីអ្នកដទៃ និងខ្លួនឯង"។ យុវនិស្សិតវ័យក្មេង រូបនេះបានបន្តទៀតថា ទោះបីយើងមិនបានជួបជុំនិស្សិតព្រះសហគមន៍ទាំងអស់គ្នា ប៉ុន្តែយើងសប្បាយដោយបានចែកនូវបទពិសោធន៍ក្នុងជិវិតសិក្សារបស់ខ្លួនផងដែរ។ និស្សិតទាំងអស់់រិះគិតរួមគ្នា តើត្រូវជួយកសាងព្រះសហគមន៍តាមរបៀបណា? ព្រោះយើងទាំសអស់គ្នាជា "ពន្លកនៃព្រះសហគមន៍ និងសង្គមជាតិ" យើងក៏ជាកំលាំងមួយ ដើម្បីកសាងសន្តិភាពផងដែរ តាមរយៈនៃការលើកលែងទោសអោយគ្នាទៅវិញទៅមក។ លោកក៏អរព្រះគុណព្រះជាម្ចាស់ផងដែរ ដែលមានយុវនិស្សិតយើងមួយចំនួនជាអ្នកអប់រំ ជំនឿ ជួយសួរសុខទុក្ខអ្នកជំងឺ។
យុវជនយុវនារីជាចលករមួយដ៏ប្រសើរក្នុងការអភិវឌ្ឍន៍ព្រះសហគមន៍ និងសង្គមទាំងមូល។ ប៉ុន្តែយុវជនត្រូវការទទួលការអប់រំតាមផ្លូវល្អជានិច្ច និងផ្តល់ឱកាស ដើម្បីធ្វើការសំរេចចិត្ត ការបញ្ចេញយោបល់ និងការរិះគិតពិចារណា រៀបចំគំរោងការទៅថ្ងៃអនាគត។ លោក ចាបរស់ សុចរ៉ាក់ និស្សិតផ្នែកគណនេយ្យ រស់នៅរាជធានីភ្នំពេញ ដែលចូលរួមក្នុងពិធីជំនួបនិស្សិតនេះដែរនោះ បានចាប់អារម្មណ៍ថា៖ "កម្មវិធីប្លែក និងសប្បាយរីករាយណាស់"។ លោកសូមអរព្រះគុណព្រះជាម្ចាស់ដែលប្រទានអោយមានពេលវេលាដ៏ប្រសើរនេះ ដែលផ្តល់អោយយុវនិស្សិតកាតូលិកទាំងអស់ មានពេលរិះគិតរួមគ្នាថា តើត្រូវរស់នៅរបៀបណា និងធ្វើយ៉ាងម៉េច ដើម្បីអោយមានភាពស្និតស្នាលនឹងគ្នា តើនិស្សិតកាតូលិកត្រូវកសាងសន្តិភាពយ៉ាងដូចម្តេច? យុវនិស្សិតរូបនេះបន្តថា យើងជួបគ្នាដោយគ្មានការរើសអើងឡើយ។ ត្រង់ចំនុចនេះលោកបូជាចារ្យអាស្លី ក៏បានយល់ព្រម ដោយលោកបញ្ជាក់ថា៖ "ទាំងប្រុស ទាំងស្រីរួមគ្នាដោយមិនប្រកាន់ គេចេះទទួលខុសត្រូវរៀបចំកម្មវិធី និងទទួលខុសត្រូវសំរាប់អនាគត ក្នុងការជួយព្រះសហគមន៍។ នៅក្នុងកម្មវិធីនេះ មានការចែករំលែកនូវបទពិសោធន៍ ពីសំណាក់និស្សិតមួយចំនួនអំពីជិវិតរស់នៅក្នុងទីក្រុង រឺក្នុងមណ្ឌលដែលមាន និស្សិតមកពីកន្លែងផ្សេងៗ និងមានបងស្រីក្នុងក្រុមដូនជីសំងាត់ ដែលមកពីប្រទេសកូរ៉េ ដើម្បីរស់នៅកម្ពុជា និងអធិដ្ឋានសំរាប់ព្រះសហគមន៍កាតូលិក នៅកម្ពុជា ក៏បានចែកបទពិសោធន៍អំពីជិវិតជាអ្នកបួស និងការរស់នៅរបស់គាត់ផងដែរ។ មុនពេលបែកគ្នានិស្សិតទាំងអស់រួមគ្នាអរព្រះគុណព្រះជាម្ចាស់ និងទូលអង្វរសំរាប់ថ្ងៃអនាគត។
លោកបូជាចារ្យ អេន រីកូ បានជូនពរអោយនិស្សិតទាំងអស់អោយពោរពេញដោយភាពអស់កំលាំងយ៉ាងខ្លាំងបំផុត ដោយលោកសង្កត់ធ្ងន់ថា៖ "អស់កំលាំង គឺក្នុងការបញ្ចេញសកម្មភាពក្នុងសង្គម ការទទួលអ្នកដទៃ និងក្នុងការកសាងសន្តិភាព"។
បើតាមការប៉ាន់ប្រមាណរបស់លោកឱពុក អេនរីក សព្វថ្ងៃនេះមាននិស្សិតដែលជាគ្រិស្តបរិស័ទកាតូលិក រឺទទួលការឧបត្ថម្ភពីព្រះសហគមន៍កាតូលិកមានចំនួនប្រមាណជាង ១៥០នាក់ ដែលមកពីខេត្តផ្សេងៗ និងនៅភ្នំពេញ ហើយស្នាក់នៅតាមផ្ទះ ផ្ទះជួល សាលារៀន និងតាមមណ្ឌលនានា។ មណ្ឌលទាំងនោះមាន មណ្ឌលនិស្សិតកាតូលិកកម្ពុជា ដែលមានលោកឱពុក អេនរីកូ និងបងស្រី វេនឌី ជាអ្នកទទួលខុសត្រូវ មណ្ឌលយុវជនយុត្តិធម៌ក្នុងការសិក្សា ក្រោមការគ្រប់គ្រងរបស់លោកឪពុកអូលីវីយេ មណ្ឌលយុវជនផ្សារតូច គ្រប់គ្រងដោយលោកឪពុក ហ្វ្រង់ស្វ័រ សាវីយេ មណ្ឌលនិស្សិតរបស់លោកប៊ែណា និងមណ្ឌលនិស្សិតព្រែកលៀប។
Article Source: ការិយាល័យផ្សព្វផ្សាយព័ត៌មានកាតូលិក កម្ពុជា
|
Print this page
News #263