|
កម្ពុជា៖សាលាបឋមសិក្សាដុនបូស្កូច្រេសត្រូវបានសម្ពោធ
Posted: 21st June 2005
ឯកឧត្តមអ៊ឹម សិទ្ឋីឡើងកាត់ខ្សែបូរ
|
ភ្នំពេញ(C.S.C)៖នាព្រឹកថ្ងៃទី១៧ មិថុនា២០០៥ នៅភូមិច្រេសសង្កាត់ភ្នំពេញថ្មីខ័ណ្ឌឫស្សីកែវរាជធានីភ្នំពេញ ដែលមានចំងាយ១២គីឡូម៉ែត្រពីទីក្រុងភ្នំពេញមានបើកពិធីសម្ភោធអាគារសិក្សាមួយខ្នងដែល មានឈ្មោះថា "សាលាបឋមសិក្សាដុនបូស្កូច្រេស" ដែលមានកំពស់២ជាន់ និង១២បន្ទប់ ដែលសាលានេះចាប់ផ្តើមកសាងតាំងពីខែមិនាឆ្នាំ២០០២។ ការកសាងនេះបានទទួលថវិកាពីសប្បុរសជនអ្នកស្រីទីណា ស៊ីតូនី (Ms Tina Sirtony) ដែលជាអ្នកស្ម័គ្រចិត្តអ៊ីតាលី និងលោក និងលោកស្រីហ្វុមីអុ (Fumio) និងគីកុ កាមុយវ៉ារា (Keiku Kamuwara) ព្រមទាំងមិត្តភក្តិជាច្រើនរូបទៀតមកពីប្រទេសជប៉ុនដែលចំនួនទឹកប្រាក់សរុបទាំងអស់សំរាប់កសាងអាគារនេះមានតលៃ១៧០,៥៨២,៣២ដុល្លារ។
ក្នុងឱកាសនោះដែរមានការអញ្ជើញចូលរួមជាកិត្តិយសក្រោមអធិបតេយ្យភាពឯកឧត្តមអ៊ឹម សិទ្ធី រដ្ឋលេខាធិការក្រសួងអប់រំយុវជននិងកីឡា ឯកឧត្តមម៉ាន់ឈឿនអភិបាលរងក្រុងរាជធានីភ្នំពេញបងស្រីសាលេស៊ាន បងប្រុស លោកបូជាចារ្យ អ្នកគ្រូអាណាព្យាបាលសិស្ស និងសិស្សានុសិស្សជាច្រើនរូបទៀត។ ជាកិច្ចចាប់ផ្តើមបងស្រីអូសូនី បានឡើងថ្លែងពីរបាយការណ៍នៃសាលាដុនបូស្កូដែលចាប់ផ្តើមពីដំបូងជូនភ្ញៀវកិត្តិយស។ បងស្រីបានអោយដឹងថានៅខែមេសា២០០២ក្រុមបងស្រីរួមជាមួយក្រុមស្ម័គ្រចិត្ត (Vides) បានចាប់ផ្តើមរួមគ្នាជួយដល់ក្មេងក្រីក្រដែលរស់នៅក្នុងភូមិច្រេសដោយបានបង្រៀននូវភាសាខ្មែរ គណិតវិទ្យា និងអប់រំចិត្តរៀងរាល់ថ្ងៃអាទិត្យ។ ក្មេងៗក៏ចាប់ផ្តើមមករៀនដោយមានចំណាប់អារម្មណ៍យ៉ាងខ្លាំងទៅលើការសិក្សានេះ។ មកដល់ខែតុលាឆ្នាំ២០០២ សាលាបានចាប់ផ្តើម បើកចាប់ពីថ្នាក់មត្តេយ្យរហូតដល់ថ្នាក់ទី៣ ដែលមានពេលនោះមានសិស្សចូលរៀនចំនួន ២០០នាក់។ នៅឆ្នាំសិក្សា ២០០៣-២០០៤ សាលានេះក៏បានបើករហូតដល់ ថ្នាក់ទី៤ និងទី៥ ដែលមានសិស្សចំនួន ២៩០នាក់។ រហូតមកដល់ពេល នេះសាលាបានបើករហូតដល់ថ្នាក់ទី៦ ដែលមានសិស្សចំនួន ៣៨៤ នាក់។ បងស្រីបានបន្ថែមទៀតថា សាលាបានផ្តល់ទាំង សំភារៈសិក្សា ឯកសណ្ឌាន និងអាហារថ្ងៃត្រង់ដល់សិស្សទាំងអស់ដោយឥតគិតថ្លៃទៀតផង ហើយសាលានេះចាប់ផ្តើម ចូលរៀនពីម៉ោង៧:៤៥នាទីព្រឹករហូតដល់ម៉ោង៤:០០នាទីរសៀលរៀងរាល់ថ្ងៃច័ន្ទដល់ថ្ងៃ សុក្រ។
ក្រោមបរិយាកាសប្រកបដោយភាពសប្បាយរីករាយនោះ ឯកឧត្តមអ៊ឹម សិទ្ឋី រដ្ឋលេខាធិការក្រសួងអប់រំ យុវជន និងកីឡា បានឡើងមានមតិផ្តាំផ្ញើ ក៏ដូចជាការសំណេះសំណាលជាមួយបងប្អូនប្រជាពលរដ្ឋ សិស្សានុសិស្ស និងភ្ញៀវកិត្តិយសជាច្រើនរូបទៀត។ ឯកឧត្តមបានមានប្រសាសន៍ថាវាជាមោទនភាពមួយសំរាប់រូបលោក និងសូមសំដែងដល់ការដឹងគុណចំពោះអង្គការដុនបូស្កូដែលបានរួមចំណែកជួយដល់ការអប់រំ និងធ្វើជាដៃគូដ៏សំខាន់របស់ក្រសួង អប់រំយុវជន និងកីឡា។
ឯកឧត្តមម៉ាន់ ឈឿន អភិបាលរងរាជធានីភ្នំពេញក៏បានឡើងធ្វើការសំណេះសំណាលជាមួយសិស្សានុសិស្ស និងភ្ញៀវកិត្តិយសនាពេលនោះផងដែរ។ ឯកឧត្តមបានមានប្រសាសន៍ថា៖ "ភាពក្រីក្រតែងតែមកតាមជានិច្ចជាមួយនឹងអក្ខរភាព ដូចនេះដើម្បីបំបាត់នូវភាពអត់ឃ្លានជាដំបូងចាំបាច់យើងត្រូវបំបាត់អនក្ខរភាពជាមុនសិន ហើយជាពិសេសកត្តាសំខាន់ដែលធ្វើអោយប្រទេសជាតិរីកចំរើន គឺអាស្រ័យទៅលើធនធានមនុស្ស"។ ឯកឧត្តមបន្ថែមទៀតថា សាសនាណាក៏ដូចជាសាសនាដែរ កត្តាសំខាន់គឺយើងត្រូវធ្វើការរួបរួមគ្នា ខិតខំកសាងនូវប្រទេសជាតិ ធនធានមនុស្សអោយកាន់តែមានភាពរីកចំរើន។
លោកសៅ សាន អាយុ ៦២ឆ្នាំជាអាណាព្យាបាលសិស្សដែលបានចូលរួមក្នុងឱកាសនោះបានផ្តល់ជាចំណាប់អារម្មណ៍ចំពោះរូបលោកថា លោកមានអារម្មណ៍សប្បាយដោយគ្មានអ្វីប្រៀបផ្ទឹមបាន និងពេញចិត្តចំពោះសាលាដុនបូស្កូនេះ យ៉ាងខ្លាំងដោយសាលាបានផ្តល់នូវសំភារៈសិក្សាគ្រប់យ៉ាងដែលកូនរបស់គាត់ក៏ដូចជាសិស្សដទៃទៀត។ គាត់បានបន្ថែមទៀតថា៖ "ខ្ញុំសង្ឃឹមថានៅពេលដែលកូនរបស់ខ្ញុំបញ្ចប់ការសិក្សានៅ វានឹងទទួលបាននូវចំណេះដឹង និងវិជ្ជាជីវៈមួយដែលសាលាបានផ្តល់អោយ"។
ជាមួយគ្នានោះកុមារី តុប ទីណាវូ រៀនថ្នាក់ទី៦ បានអោយដឹងថា នាងមានអារម្មណ៍រំភើបសប្បាយរីករាយ ដែលមានសាលារៀនមួយនៅក្បែរផ្ទះ។ អ្វីដែលនាងបានទទួលគឺចំណេះដឹងមួយដ៏ល្អ ដែលអាចធ្វើអោយនាងពឹងពាក់ ទៅថ្ងៃក្រោយបាន។
បន្ថែមពីលើនេះទៀតបងស្រីអូសូនី ដែលជានាយកនៅសាលានេះបានអោយដឹងទៀតថា៖ "ខ្ញុំមានចិត្ត សប្បាយរីករាយមែនទែននៅក្នុងថ្ងៃនេះ ព្រោះមានមនុស្សជាច្រើនបានមកចូលរួម ហើយសាលារបស់យើង ជាសាលានៃក្តីស្រឡាញ់ទាំងអស់គ្នា។ យើងទទួលបានជំនួយបន្តិចម្តងៗរហូតដល់បានកសាងសាលានេះរួច សំរាប់ផ្តល់ការអប់រំកូនៗ ទាំងអស់អោយក្លាយទៅជាពលរដ្ឋមួយដ៏ល្អ ស្មោះត្រង់ក្នុងសង្គម”។
ជាកិច្ចបញ្ចប់នៃពិធីសម្ភោធនោះ ក៏មានការផ្តល់ជាមេដាយ និងប័ណ្ណសរសើរពីសំណាក់ឯកឧត្តមរដ្ឋលេខាធិការ ក្រសួងអប់រំយុវជន និងកីឡា ជូនដល់សប្បុរសជន ព្រមទាំងការអញ្ជើញកាត់ខ្សែបូរ ពីសំណាក់ភ្ញៀវកិត្តិយស និងការពិសារភោជនីយអាហារ ព្រមទាំងមានការថតរូបជុំគ្នាទុកជាអនុស្សាវរីយ៍ក្រោមបរិយាកាសស្របកបដោយមានរីករាយ។
Article Source: ការិយាល័យផ្សព្វផ្សាយព័ត៌មានកាតូលិក-C.S.C
|
Print this page
News #224