|
កម្ពុជា៖ ក្រុមយ៉ារូម៉ាលមានឧបដ្ឋាកថ្មីពីរអង្គតែងតាំង
Posted: 14th June 2005
បងប្រុសចន និងបងប្រុសដាវ៉ាន់
|
ភ្នំពេញ(C.S.C)៖នៅថ្ងៃនេះអ្នកបំរើ ពីររូប បានស្ម័គ្រចិត្ត ឆ្លើយតបនឹងការត្រាស់ហៅ របស់ព្រះជាម្ចាស់ ជាឧបដ្ឋាក ធ្វើជាអ្នកបំរើនៅក្នុងចំការរបស់ព្រះអង្តនៅប្រទេសកម្ពុជា។ លោកទាំងពីរជាក្រុមសាសនទូត យ៉ារូម៉ាលមកពីប្រទេសកូឡំប៊ី និងប្រទេសអេក្វាដ័រ។
ស្ថិតនៅក្រោមដំបូលប្រក់ក្រណាត់កៅស៊ូ មានមនុស្សម្នាជាច្រើនកុះករ អង្តុយនៅតាមកៅអី ដែលគេបានរៀបចំបំរុងទុក មានប្រមាណជាជិត ១០០០នាក់។ បងប្អូនទាំងនោះមកពីព្រះសហគមន៍ភូមិភាគទាំងបី កំពង់ចាម បាត់ដំបង និងភូមិភាគភ្នំពេញ។ ភ្លេងរបាំ ក្ងោកពោធិសាត់ បានបន្លឺសំលេងរបស់ខ្លួនឡើង។ យុវនារីស្លៀកសំលៀកបំពាក់ពណ៌បៃតងចាស់ រាំកាច់ពត់ពេនទៅតាមចង្វាក់ភ្លេង។ ក្បួនដង្ហែរបានធ្វើដំណើរ បន្ទាប់ពីរបាំដ៏ល្អគយគន់នេះ។ យុវជនបួនរូបស្ថិតក្នុងសំលៀកបំពាក់អាវបំពង់វែងពណ៌ស ពីលើដល់ក្រោម ដែលក្នុងដៃមានកាន់នូវឈើឆ្កាង ទៀនមួយគូ និងព្រះគម្ពីរ។ យុវជនទាំងនេះជានិស្សិតទេវវិទ្យាល័យកម្ពុជា។ ខាងក្រោយមានលោកអាចារ្យព្រះសហគមន៍បួនរូប ហើយនិងលោកឧបដ្ឋាកដែលត្រូវតែងតាំងទាំងពីររូបព្រមទាំងអស់លោកបូជាចារ្យនិងលោកអភិបាលទាំងបីនៅខាងក្រោយ ។ នៅពេលអស់លោកបានសំរួលអរិយាបទតាមកន្លែងរួចរាល់ហើយ កញ្ញាស្រីណេតយុវជនកំពង់ចាមបានឡើងប្រកាសថា៖"នេះជាលើក ទី ២យើងបានជួបគ្នា នៅក្នុងពិធីតែងតាំងលោកឧបដ្ឋាកដែលកាលពីប៉ុន្មានឆ្នាំមុនពិធីតែងតាំងលោកឧបដ្ឋាក ខ្មែរចំនួន៤នាក់"។ នាងបានបន្តអាននូវប្រវត្តិរបស់បងប្រុសទាំងពីរ ដែលបានស្ម័គ្រចិត្តទទួលការត្រាស់ហៅរបស់ព្រះជាម្ចាស់ ចូលរៀននៅទេវវិទ្យាល័យ ក្នុងក្រុម សាសនទូតយ៉ារូម៉ាល់ យកជីវិតជាបព្វជិក។
លោកយ៉ូហាន អាបេ អាយុ ៣៣ឆ្នាំ មកពីប្រទេសកូឡំប៊ី បានមានប្រសាសន៍ថា៖ "ខ្ញុំសូមអរព្រះគុណព្រះជាម្ចាស់ ដែលបានត្រាស់ហៅខ្ញុំអោយធ្វើជាបូជាចារ្យ និងធ្វើជាសាសនទូត"។ ហើយក៏ធ្វើអោយលោកមានអំណរសប្បាយយ៉ាងពិតប្រាកដដែលព្រះយេស៊ូត្រាស់ហៅលោក ដើម្បីចែកព្រះកាយ និងព្រះលោហិតរបស់ទ្រង់ជាមួយបងប្អូនប្រុសស្រីជាច្រើនទៀត។ ចំណែកលោកអ៊ីវ៉ាន់ (ដាវ៉ាន់) អាយុ ៣០ឆ្នាំ មកពីប្រទេសអេក្វាដ័រ បានបញ្ជាក់ពីប្រវត្តិនៃការត្រាស់ហៅរបស់ព្រះជាម្ចាស់ក្នុងជីវិតរបស់លោកថា៖ "ខ្ញុំមានអារម្មណ៍ថាព្រះជាម្ចាស់ត្រាស់ហៅខ្ញុំ ដើម្បីបំរើព្រះសហគមន៍ និងធ្វើជាសាសនទូត តាំងពីខ្ញុំនៅជាយុវជន ដែលកំពុងជួយសកម្មភាព សាសនទូតនៅក្នុងព្រះសហគមន៍របស់ខ្ញុំ"។ លោកបានអោយដឹងថានៅពេល នោះមានយុវជនជាច្រើនបានចូលរួមសកម្មភាពព្រះសហគមន៍ ដូចជាសួរសុខទុក្ខអ្នកក្រីក្រ អ្នកជំងឺ អប់រំជំនឿ ការរិះគិតពីជិវិតក្នុងវិញ្ញាណ និងសកម្មភាពសង្គម។
ចំពោះបទពិសោធន៍ រយៈពេល ១០ខែនៅប្រទេសកម្ពុជា លោកទាំងពីរបានមានប្រសាសន៍ថា ជាពេលវេលាមួយដ៏ល្អដើម្បីស្តាល់វប្បធម៌ខ្មែរ និងរៀនភាសាខ្មែរ និងរៀនច្រើនពីប្រជាជនក្នុងជីវិតប្រចាំថ្ងៃ ដោយលោកទាំងពីរជួយលើកទឹកចិត្តគ្រិស្តបរិស័ទ ដើម្បីអោយគេមានសង្ឃឹមទៅថ្ងៃអនាគត បន្តកសាងព្រះសហគមន៍អោយមានការរីកចំរើន។
លោកសុខ នឿន គ្រិស្តបរិស័ទមកពីកំពង់ចាមដែលបានធ្វើការយ៉ាងជិតស្និតជាមួយលោកដាវ៉ាន់ បានអោយដឹងថា៖ "លោកដាវ៉ាន់ សកម្មណាស់ ដោយលោកធ្វើការយ៉ាងជិតស្និតជាមួយយុវជន ក្មេងៗ និងអ្នកក្រីក្រ"។ ជាពិសេស លោកបានជួយលើកទឹកចិត្តយុវជនអោយខិតខំសិក្សា ដើម្បីជួយកសាងព្រះសហគមន៍ និងប្រទេសជាតិរបស់គេ។
លោកឪពុកអូម៉ែរ ហ្គីរ៉ាល់ដូ អ្នកទទួលខុសត្រូវក្នុងក្រុមនេះបានបង្ហាញនូវអារម្មណ៍រីករាយថា៖ "ខ្ញុំមានរីករាយខ្លាំងណាស់ ដែល និស្សិតទេវវិទ្យាល័យក្រុមយ៉ារូម៉ាល់បានតែងតាំងជាឧបដ្ឋាកនៅប្រទេសកម្ពុជា ក្រោយពីក្រុមនេះបានចូលមកប្រទេសខ្មែររយៈពេល១១ ឆ្នាំកន្លងមកហើយ"។
ក្រុមសាសនទូតយ៉ារូម៉ាល់ បង្កើតឡើងនៅថ្ងៃ ទី ៣ ខែកក្កដា ឆ្នាំ១៩២៧ ដោយលោក អភិបាល ភូមិភាគ Santa Rosa de Osos ក្នុងខេត្ត Atoguia នៃប្រទេសកូឡំប៊ីខាងលិច។ ឈ្មោះលោកអភិបាល IGUEL ANGEL BUILES ។ ហើយបានបំពេញបេសកកម្មរបស់ខ្លួននៅទ្វីបអាមេរិកឡាទីន អាហ្វ្រិក និងទ្វីបអាស៊ី ក្នុងប្រទេសកម្ពុជា នៅថ្ងៃទី១៣ មិថុនា ឆ្នាំ១៩៩៥ ។ សព្វថ្ងៃក្រុមនេះមានលោកឪពុកអូម៉ែរ ហ្តីរ៉ាល់ដូ លោក ឪពុកអែរណាន់ ពីនីឡា លោកឪពុកយ៉ូហាន ដេយេស៊ូ លោកឪពុកពេដ្រូ យេស៊ូ និងលោកឧដ្ឋាកថ្មី២រូបដែលកំពុងបំពេញបេសកកម្មនៅប្រទសកម្ពុជា។
Article Source: ការិយាល័យផ្សព្វផ្សាយព័ត៌មានកាតូលិក-C.S.C
|
Print this page
News #223