|
កម្ពុជា៖ ការពង្រឹងកិច្ចសហប្រតិបត្តិការរវាងសាសនាធំៗ
Posted: 7th June 2005
|
ភ្នំពេញ(C.S.C)៖កិច្ចប្រជុំស្តីអំពីការ "ពង្រឹងកិច្ចសហប្រត្តិបត្តិការអន្តរសាសនាដើម្បីសន្តិភាពនិងភាពសុខដុមរបស់សង្គម" ត្រូវបានរៀបចំឡើងដោយក្រុមប្រឹក្សាអន្តរសាសនាកម្ពុជាកាលពីថ្ងៃអង្គារទី៣១ ឧសភានៅឯវិទ្យាស្ថានពុទ្ធសាសនបណ្ឌិត។
កិច្ចប្រជុំនេះត្រូវបានធ្វើឡើងដោយមានការចូលរួមពីអ្នកតំណាងសាសនិកនៃសាសនាធំទាំងបីនៅកម្ពុជាមានសហគមន៍ពុទ្ធសាសនិកឥស្លាមសាសនិកនិងគ្រិស្តសាសនិកព្រមទាំងសង្គមស៊ីវិលនិងអង្គការផ្សេងជាច្រើនទៀតដែលទាំងអស់មានអ្នកចូលរួមប្រមាណ ជា ៨០នាក់ដោយស្ថិតនៅក្រោមអធិបតីភាពរបស់ឯកឧត្តមឈនអៀមដែលជារដ្ឋលេខាធិការក្រសួងធម្មការនិងសាសនា។
តាមប្រសាសន៍របស់លោកយីធន់អគ្គលេខានៃក្រុមប្រឹក្សាអន្តរសាសនាបានគូសបញ្ជាក់ឲ្យដឹងថា៖ "សម័យប្រជុំអន្តរសាសនាលើកនេះគឺធ្វើឡើងដើម្បីស្វែងរកវិធានការទប់ស្កាត់បាតុភាពមិនប្រក្រតីទាំងឡាយដែលអាចកើតមានឡើងជាយថាហេតុតាមរយៈការអញ្ជើញ មេដឹកនាំនិងអ្នកដំណាងគេឲ្យមកធ្វើការពិភាក្សាគ្នា។ម្យ៉ាងវិញទៀតយើងចង់ឲ្យសាសនាធំៗទាំងបីមានពុទ្ធសាសនាឥស្លាមសាសនានិងគ្រិស្តសាសនាអាចពង្រឹងកិច្ចសហប្រតិបត្តិការរវាងគ្នាឲ្យរឹតតែបានទូលាយថែមទៀតដើម្បីស្វែងរកសន្តិភាពនិងការរស់នៅជុំគ្នាប្រកបដោយភាពសុខដុមរមនា"។
នៅក្នុងឱកាសនោះដែរលោកបូជាចារ្យអ៊ុនសុនដែលជាអ្នកតំណាងឲ្យព្រះសហគមន៍កាតូលិកនៅកម្ពុជាបានកត់សម្គាល់ថាការរៀបចំកិច្ចប្រជុំអន្តរសាសនាឡើងមកនេះគឺមានលក្ខណៈល្អប្រសើរណាស់ពីព្រោះតាមរយៈនេះមេដឹកនាំសាសនាទាំងអស់អាចមានទំនាក់ទំនងគ្នាស្គាល់គ្នាយោគយល់គ្នាកាន់តែច្បាស់ថែមទៀតដែលធ្វើឲ្យពួកគេអាចពន្យល់ទៅកាន់សាសនិកធម្មតាកុំឲ្យជឿលើពាក្យចចាមអារ៉ាមផ្តេសផ្តាសនិងមានការភាន់ច្រឡំអំពីសាសនាអ្នកដទៃដែលនេះអាចបង្កឲ្យមានជម្លោះនិងអស្ថេរភាពរវាងគ្នានិងគ្នា។លោកបូជាចារ្យក៏បានផ្តាំផ្ញើរទៅយុវជនគ្រិស្តបរិស័ទផងដែលថា៖ "យើងត្រូវតែស្រលាញ់អ្នកដទៃឲ្យដូចជាស្រឡាញ់ខ្លួនឯងពីព្រោះព្រះជាម្ចាស់ក៏តែងតែស្រឡាញ់គ្រប់ៗគ្នាដូចជាបុត្រធីតារបស់ទ្រង់"។
នៅពេលសម័យប្រជុំបានបញ្ចប់មេដឹកនាំនិងអ្នកតំណាងសាសនាទាំងអស់ក៏បានឯកភាពគ្នាលើគោលការណ៍មួយចំនួនដូចជាទី១នឹងបង្កើតឲ្យមានការជួបប្រជុំគ្នារវាងមេដឹកនាំសាសនាទាំងឡាយឲ្យបានញឹកញាប់តាមដែលអាចធ្វើទៅបានក្នុងគោលបំណងធ្វើឲ្យមានការយោគយល់គ្នាទៅវិញទៅមកនិងពង្រឹងកិច្ចសហប្រតិបត្តិការដើម្បីការអភិវឌ្ឍន៍សង្គមនិងការកសាងសន្តិភាព។ទី២ នឹងបង្កើតឡើងនូវក្រុមការងារអន្តរសាសនានៅថ្នាក់ខេត្តក្រុងដើម្បីពង្រឹងកិច្ចសហប្រតិបត្តិការជាមូលដ្ឋាន។និងចុងក្រោយគឺកសាងសមត្ថភាពដល់មេដឹកនាំសាសនាថ្នាក់មូលដ្ឋាននិងអ្នកគាំទ្រទាំងឡាយនោះអំពីការដោះស្រាយទំនាស់តាមរយៈការរៀបចំឲ្យមានសិក្ខាសាលា។
Article Source: ការិយាល័យផ្សព្វផ្សាយព័ត៌មានកាតូលិក-C.S.C
|
Print this page
News #220