|
ព្រះវិហារកំពង់ចាម-ក្មេង២២៤នាក់ចូលរួមអបអរទិវាកុមារអន្តរជាតិ
Posted: 2nd June 2005
|
កំពង់ចាម(C.S.C)៖ នាព្រឹកថ្ងៃទី១ និងទី២ ខែមិថុនានៅព្រះវិហារកំពង់ចាមមានប្រារព្ធទិវាកុមារអន្តរជាតិគំរប់លើកទី៥៦ និងជាលើកទី៦ សំរាប់ខេត្តកំពង់ចាម។ក្នុងឱកាសនោះមានការចូលរួមពីសំណាក់កុមារាកុមារីលោកអភិបាលអង់តូនីលោកបូជាចារ្យហ្សើរ៉ាល់និងលោកឈួយម៉ុងស្រេងតំណាងមកពីមន្ទីរអប់រំយុវជននិងកីឡាខេត្តកំពង់ចាមព្រមទាំងលោកគ្រូអ្នកគ្រូជាច្រើននាក់ទៀត។ពិធីនេះមានការចូលរួមពីក្មេងៗមកពីភូមិចំនួន ១០ភូមិដូចជាភូមិកោះរកាភូមិថ្មីក្តុលលើថ្មពេជ្រទី១ ថ្មពេជ្រទី២ ត្រពាំងកណ្តោលចំលាក់អណ្តូងច្រោះរោងច្រកបឹងកុកដែលសរុបទាំងអស់មានចំនួន ២២៤ នាក់ហើយក្មេងដែលមកចូលរួមនោះត្រូវបានគេកំណត់ចាប់ពីអាយុ ៨-១៦ឆ្នាំ។
នៅព្រឹកនោះដែរមានការទទួលស្វាគមន៍ ក្មេងៗដែលធ្វើដំណើរមកពីភូមិផ្សេងៗនិងមានការកាត់ខ្សែបូរទុកជាអនុស្សាវរីយ៍ព្រមទាំងការព្រលែងប៉េតប៉ោងពីសំណាក់លោកអភិបាលនិងលោកតំណាងមកពីមន្ទីរអប់រំ។
លោកអភិបាលអង់តូនីបានមានប្រសាសន៍អោយដឹងថា៖ "ខ្ញុំមានអារម្មណ៍សប្បាយដោយឃើញមានក្មេងៗមកចូលរួមច្រើនក្នុងថ្ងៃនេះ។ហើយក្នុងឱកាសទីវាកុមារអន្តរជាតិនេះក្មេងៗទាំងអស់នឹងទទួលបាននូវការអប់រំខ្លះៗដែលកម្មវិធីបានបង្ហាញជូនដោយមានបំណងផ្សព្វផ្សាយពីតំលៃរបស់ក្មេងទាំងនេះតាមរយៈការអប់រំទាំងសាសនាកាតូលិកនិងសាសនាដទៃទៀតនៅក្នុងភូមិភាគរបស់យើង"។
លោកតំណាងមកពីមន្ទីរអប់រំខេត្តក៏បានឡើងធ្វើការសំណេះសំណាលជាមួយក្មេងៗនាឱកាសនោះនិងលោកបានមានប្រសាសន៍ប្រាប់នូវប្រវត្តិខ្្លះៗនៃទិវាកុមារអន្តរជាតិនេះព្រមទាំងធ្វើការផ្តែផ្តាំទុកជាដំបូន្មានល្អៗសំរាប់ពួកគេផងដែរ។
ក្រៅពីការចូលរួមធ្វើការសំណេះសំណាលនាឱកាសនោះក៏មានការប្រលងរបាំប្រលងរាំនិងកម្មវិធីជាច្រើនទៀតសំរាប់អោយក្មេងៗចូលរួមលេងកំសាន្ត។កុមារាធន់វ៉ាន់ឌីអាយុ ១៣ឆ្នាំមកពីភូមកោះរកាបានអោយដឹងថា៖ "ខ្ញុំបានមកចូលរួមនៅក្នុងឱកាសនេះជាលើកទី៣ ហើយហើយនៅឆ្នាំនេះខ្ញុំមានរបាំមួយដើម្បីចូលរួមធ្វើការប្រកួតគឺរបាំក្រាប"។
នៅថ្ងៃទី២ ជាថ្ងៃចុងបញ្ចប់នៃកម្មវីធីមានការចែកជូននូវរង្វាន់ដល់អ្នកឈ្នះនិងមានការរៀបចំម្ហូបអាហារដល់ពួកគេប្រកបដោយភាពសប្បាយរីករាយ។
Article Source: ការិយាល័យផ្សព្វផ្សាយព័ត៌មានកាតូលិក
|
Print this page
News #218