|
ព្រះរាជពិធីរាជាភិសេកព្រះករុណាព្រះបាទសម្តេចព្រះបរមនាថនរោត្តម សីហមុនី
Posted: 23rd November 2004
ព្រះបាទព្រះបរមនាថនរោត្តមសីហមុនី
|
ភ្នំពេញ-ព្រះរាជាណាចក្រកម្ពុជាយើង មានអំណរសប្បាយដោយមានព្រះមហាក្សត្រថ្មីគឺ ព្រះករុណាព្រះបាទសម្តេចព្រះបរមនាថនរោត្តមសីហមុនី ទ្រង់ឡើងគ្រោងរាជ្យបន្តពីព្រះបិតារបស់ទ្រង់ព្រះបាទសម្តេចព្រះនរោត្តមសីហនុ។ ព្រះរាជ្យពិធីរាជាភិសេកនេះបានប្រព្រឹត្តទៅរយៈពេលបីថ្ងៃ ពីថ្ងៃព្រហស្បតិ៍ទី២៨ ដល់ថ្ងៃសៅរ៍ទី៣០ ខែតុលា ឆ្នាំ២០០៤ ត្រូវនឹងថ្ងៃ២រោចខែអស្សុជ ឆ្នាំវក ឆស័ក ព.ស ២៥៤៨ ប្រកបទៅដោយបរិយាកាសអធិអធម សប្បាយរីករាយ និងជោគជ័យ។
នៅថ្ងៃដំបូងនៃពិធីរាជាភិសេក មានរៀបចំពិធីតាមរបៀបប្រពៃណីខ្មែរ ដែលមានវង្សានុវង្សចូលរួម។ ដោយឡែកនៅថ្ងៃទី២នៃពិធីនេះ មានការចូលរួមយ៉ាងកុះករ រួមមាន មន្ត្រីជាន់ខ្ពស់នៃរាជរដ្ឋាភិបាលកម្ពុជា រាជវង្សានុវង្ស អ្នកសារព័ត៌មានជាតិ និងអន្តរជាតិ។ នៅក្នុងថ្ងៃនោះដែរ យើងសង្កេតឃើញមានព្រះរាជ្យពិធីសំខាន់ៗចំនួនពីរគឺ ព្រះរាជពិធីស្រង់ព្រះសុគន្ធវារី ក្នុងព្រះរាជពិធីនេះមានប្រារព្ធពិធីបួងសួង ហើយព្រះសង្ឃ៩អង្គស្វាធ្យាយថ្វាយពុទ្ធជ័យដល់ព្រះមហាក្សត្រព្រះករុណាព្រះបាទសម្តេចព្រះបរមនាថ
នរោត្តមសីហមុនី សម្តេចព្រះសង្ឃរាជទាំងពីរគណៈ បានប្រទានព្រះសុគន្ធវារីថ្វាយព្រះករុណាសីហមុនី ព្រះវររាជបិតា ព្រះវររាជមាតាបានថ្វាយព្រះសុគន្ធវារីដល់ព្រះករុណាព្រះបាទសម្តេចព្រះបរមនាថ សូមព្រះករុណាមានព្រះបញ្ញាញាណភ្លឺថ្លា ព្រះជន្មាយុយឺនយូរ ដើម្បីគង់ប្រថាប់ ក្នុងព្រះសិរីរាជសម្បត្តិដ៏ត្រជាក់ត្រជំ ដល់ប្រជានុរាស្រ្តរួមរស់ក្នុងសុខសន្តិភាព និងចំរុងចំរើនរុងរឿង។
ព្រះរាជពិធីមួយទៀតនៅពេលរសៀល យើងឃើញមានព្រះរាជពិធីដង្ហែព្រះមហាក្សត្រឆ្ពោះទៅកាន់ព្រះទីនាំងទេវាវិនិច្ឆ័យ ដើម្បីព្រះរាជសច្ចាប្រណិធាន ហើយសម្តេចចៅហ្វាវាំង វររៀងជ័យ អធិបតីស្រឹង្គាសូត្រព្រះសុវណ្ណប័ត្រថ្វាយព្រះបរមនាថ ថ្វាយគ្រឿងបញ្ចកកុចភ័ណ្ឌ និងទូលថ្វាយព្រះរាជសម្បត្តិសួយសារអាករ នៃព្រះរាជាណាចក្រកម្ពុជា។ ព្រះសង្ឃ៩អង្គថ្វាយព្រះពរសព្វសាធុការ ព្រះពុទ្ធជ័យមង្គល។ នៅវេលាម៉ោង ៦ល្ងាច ក៏មានបន្លឺគងស្គរ នៅតាមទីវត្តអារាមទូទាំងព្រះរាជាណាចក្រកម្ពុជា គ្រប់ស្ថានីយ៍វិទ្យុ និងទូរទស្សន៍ចាប់ផ្តើមផ្សព្វផ្សាយ អុជកាំជ្រួច។ តំណាងព្រះរាជវង្សានុវង្ស តំណាងព្រឹទ្ធសភា រដ្ឋាសភា ក្រុមប្រឹក្សាធម្មនុញ្ញ តុលាការកំពូល រាជរដ្ឋាភិបាល យាង និងអញ្ជើញថ្វាយព្រះពរជ័យ។ ព្រះមហាក្សត្រប្រទានព្រះរាជឱង្ការ សូរសីហនាថ ព្រះរាជទានសព្វសារធុការពរជ័យដល់ប្រជារាស្រ្ត ព្រះរាជវង្សានុវង្ស នាម៉ឺនសព្វមុខមន្ត្រី។
នៅថ្ងៃទីបីនៃព្រះរាជពិធីរាជាភិសេក នៅពីមុខព្រះបរមរាជវាំង តាំងពីព្រលឹមស្រាងៗឡើងរហូតដល់ម៉ោង៧ព្រឹក ប្រជាពលរដ្ឋខ្មែរដែលចូលរួមមានទឹកមុខប្រកបដោយស្នាមញញឹម កំពុងឈរយ៉ាងត្រៀបត្រានៅអមសងខាងផ្លូវក្បែរវាលព្រះមេរុ និងតាមផ្លូវព្រះសីសុវត្ថិក្បែរមាត់ទន្លេ ដៃម្ខាងកាន់បដារូបព្រះឆាយាលក្ខណ៍ព្រះករុណាព្រះបាទសម្តេចព្រះនរោត្តមសីហនុ និងដៃម្ខាងទៀតកាន់ព្រះឆាយាលក្ខណ៍ព្រះករុណាព្រះបាទនរោត្តមសីហមុនី។ ចំណែកយុវសិស្ស និងនិស្សិតក្នុងឯកសណ្ឋានយ៉ាងសមរម្យ កំពុងកាន់ទង់ជាតិ និងព្រះរាជសង្ហានៃព្រះរាជាណាចក្រកម្ពុជាប្រកបដោយសេចក្តីអំណររីករាយជាពន់ពេក រង់ចាំមើលព្រះភ័ក្រព្រះមហាក្សត្រថ្មី។ កងយោធពលខេមរភូមិន្ទទាំងទ័ពជើងទឹក និងជើងអាកាស ឈរយ៉ាងត្រង់ជួរក្នុងឯកសណ្ឋានកងទ័ពសក្តិសមជាកុលបុត្រការពារជាតិមាតុភូមិ។ ឯក្រុមនគរបាលជាតិ កងរាជអាវុធហត្ថ ក្រុមភ្លេងរ័ត្រឈរជាជួរៗ ក្នុងទឹកមុខរឹងមាំ រង់ចាំស្តាប់ព្រះរាជសវនាការ។ ក្នុងបរិយាកាសដ៏សែនសប្បាយរីករាយនេះ មានសូរស័ព្ទសំលេងកងរំពងលាយឡំគ្នាពីសំណាក់មហាជន មន្ត្រីរាជការ និងសំលេងតន្ត្រី និងសំលេងធ្វើបទអត្ថាធិប្បាយរបស់វិទ្យុជាតិកម្ពុជា។
នៅវេលាម៉ោង៨គត់ ក្បួនរថយន្តអត់ដំបូលរបស់ព្រះករុណាព្រះបាទសីហមុនី បានយាត្រាជុំវិញបរិវេណសួនច្បារមុខព្រះបរមរាជវាំង ដើម្បីឲ្យប្រជានុរាស្រ្តបានឃើញព្រះភ័ក្រព្រះអង្គ។ ក្នុងព្រះរាជពិធី សម្តេចជាស៊ីម-ប្រធានព្រឹទ្ធសភាជាតិ សម្តេចក្រុមព្រះនរោត្តមរណឬទ្ធិ-ព្រះប្រធានរដ្ឋសភាជាតិ សម្តេចហ៊ុនសែន-នាយករដ្ឋមន្ត្រីនៃរាជរដ្ឋាភិបាលកម្ពុជា លោកកែប ជុតិមា-អភិបាលរាជធានីភ្នំពេញ បានឡើងថ្លែងសន្ទរកថាអបអរសាទរដល់ព្រះមហាក្សត្រថ្មីនាឱកាសព្រះរាជពិធីមេទ្ទេញនេះ។ ព្រះករុណាព្រះបាទសម្តេចព្រះបរមនាថសីហមុនី ក៏បានប្រទានព្រះរាជឱង្ការលើកដំបូងបំផុតរបស់ព្រះអង្គបន្ទាប់ពីក្លាយទៅជាព្រះមហាក្សត្រពេញលក្ខណៈច្បាប់។ អ្វីមួយដែលប្រជារាស្ត្រមានការចាប់អារម្មណ៍នោះគឺ មិននឹកស្មានសោះថា ព្រះអង្គបានអានខេមរភាសាយ៉ាងច្បាស់ ខុសពីការគិតថាព្រះអង្គប្រហែលជាមានព្រះវាជឱង្ការលំបាកដោយសារតែព្រះអង្គគង់នៅក្រៅប្រទេសច្រើនជាងក្នុងប្រទេស។
ព្រះអង្គបានលើកយកព្រះរាជដំបូន្មានរបស់ព្រះរាជបិតាដែលមានព្រះរាជឱង្ការថា៖ “កូន! ការដែលត្រូវចងចាំដរាបគឺ ការស្នេហាជាតិដ៏បរិសុទ្ធ។ យើងត្រូវជៀសវាងឲ្យផុតស្រឡះអំពីអំពើពុករលួយគ្រប់យ៉ាង និងនៅគ្រប់កាលៈទេសៈ។ យើងអនុវត្តអ្វីៗ គឺសំដៅដល់ការការពារឧត្តមប្រយោជន៍ដែលជាអាយុជីវិតនៃជាតិមាតុភូមិ និងប្រជាជន ប្រជារាស្ត្រខ្មែរ។ យើងត្រូវជៀសវាងបក្ខានុគ្រោះគឺ ជាការផ្តល់អ្វីដែលជាប្រយោជន៍ផ្ទាល់ខ្លួនដល់មនុស្សដែលចង់ឲ្យយើងប្រព្រឹត្តអំពើអយុត្តិធម៌ និងត្រូវជៀសវាងនូវការផ្តល់ប្រយោជន៍ខ្លួនជូនសមាជិក សមាជិកានៃក្រុមគ្រួសារយើង ឬមនុស្សដែលឡែបឡប់ឡេមឡឺមពូកែតែបញ្ចើចបញ្ចើ បញ្ចោរយើង ដើម្បីបុណ្យសក្តិ លុយកាក់ ឬប្រយោជន៍ផ្ទាល់ខ្លួនគេ។ បើយើងត្រូវជួយសង្គ្រោះជនរួមជាតិ យើងត្រូវជូនអទិភាពទៅជនរួមជាតិយើងដែលជាអ្នកក្រីក្រ ខ្វះស្បៀងអាហារ រហេមរហាមពិតប្រាកដ ហើយដែលសមនឹងទទួលជំនួយសង្គមកិច្ច និងមនុស្សធម៌អំពីយើង”។
ព្រះអង្គក៏បានលើកព្រះរាជបណ្តាំរបស់ព្រះករុណាព្រះបាទនរោត្តមសីហនុទៀតថា៖ “បើយើងចង់ជូនប្រវត្តិសាស្រ្តសំគាល់ថាយើងជាមហាក្សាត្រធំឧត្តុង្គឧត្តម យើងត្រូវចេះបន្ទាបខ្លួនយើងឲ្យនៅទាប កុំឲ្យខ្ពស់ជាងប្រជារាស្រ្តតូចតាច។ ចូរយើងកុំភ្លេចឲ្យសោះថា មហាក្សត្រពុំមែនជាចៅហ្វាយនៃប្រទេសប្រជាជាតិ ប្រជារាស្រ្តនោះទេ។ មហាក្សត្រត្រូវទុកខ្លួនក្នុងមួយជីវិត និងគ្រប់កាលៈទេសៈ គ្រប់សម័យជាអ្នកបំរើជាតិ មាតុភូមិ ប្រជាជន ប្រជារាស្រ្ត”។ ព្រះបរមនាថនរោត្តមសីហមុនី ព្រះអង្គមានព្រះរាជបន្ទូលសន្យាថា ជារៀងរាល់សប្តាហ៍ព្រះអង្គនឹងចំណាយពេលវេលាជាច្រើនថ្ងៃ ដើម្បីទៅគោរព និងបំរើជនរួមជាតិ មាមីង បងប្អូន កូនក្មួយនៅតាមខេត្តក្រុង និងជនបទជាបន្តបន្ទាប់។ ប្រជារាស្ត្រខ្មែរបានបង្ហាញនូវការអបអរសាទរ ចំពោះព្រះរាជជំហររបស់ព្រះអង្គក្នុងបរមនាមជាព្រះមហាក្សត្រនៃកម្ពុជា ដោយព្រះរាជឱង្ការបានលើកឡើងពីការប្រឆាំងអំពើពុករលួយ ការគោរពសិទ្ធមនុស្ស និងមិនត្រូវការជាដាច់ខាតនូវជនដែលនាំឲ្យព្រះអង្គប្រព្រឹត្តនូវអំពើអយុត្តិធម៌ឬ ក្រុមជាជនគ្រួសារ ឬមនុស្សឡេមឡឺម បញ្ចើចបញ្ចើ និងបញ្ជោរ ព្រោះតែបុណ្យសក្តិ និងលុយកាក់ជាដើម។
Grand Chea Oun from Stoeng Treng has expressed his feeling about the new king |
លោកតាជា អ៊ុន អាយុ៧៩ឆ្នាំ ជាប្រជាពលរដ្ឋមកពីខេត្តស្ទឹងត្រែងបានមានប្រសាសន៍ទាំងទឹកភ្នែករលីងរលោងថា៖ “ខ្ញុំមានអារម្មណ៍រំភើបញាប់ញ័រយ៉ាងខ្លាំងនៅពេលដែលបានឃើញព្រះមហាក្សត្រថ្មី ខ្ញុំនឹកឃើញពីសម័យសង្គមរាស្ត្រនិយមដែលជាសម័យដ៏រុងរឿងមួយ ខ្ញុំមានជំនឿយ៉ាងមុតមាំថាប្រទេសយើងមានស្តេច នឹងនាំមកនូវភាពត្រជាក់ត្រជុំសប្បាយរីករាយក្រោមម្លប់ព្រះបារមីរបស់ព្រះអង្គ”។
យុវនិស្សិត នូវចរិយាមកពីសាកលវិទ្យាល័យភូមិន្ទកសិកម្ម មហាវិទ្យាល័យឧស្សាហកម្មបាននិយាយដោយទឹកមុខរីករាយ និងស្រស់ស្រាយថា៖ “នាងខ្ញុំសប្បាយរីករាយណាស់
The students during King Coronation |
ដែលបានឃើញព្រះភ័ក្រព្រះមហាក្សត្រថ្មី ខ្ញុំសង្ឃឹមថាព្រះអង្គនឹងគង់ជាម្លប់ដល់កូនចៅជំនាន់ក្រោយ ធានាឲ្យសង្គមខ្មែរមានការគោរពនូវសិទ្ធ សេរីភាពគ្នាទៅវិញទៅមក។ ខ្ញុំមានសេចក្តីសង្ឃឹមលើព្រះមហាក្សត្រថ្មី ព្រះអង្គនឹងបំពេញនូវកាតព្វកិច្ច តួនាទីជាមហាក្សត្រដ៏ប្រពៃ ដូចដែលព្រះអង្គទ្រង់បានសន្យានៅចំពោះមុខប្រជារាស្រ្តខ្មែរនៅព្រឹកថ្ងៃនេះ”។
សូមរំឭកដែរថា តាមទំនៀមទំលាប់នៃការរៀបចំព្រះរាជពិធីអភិសេកនេះគឺ មានរយៈពេល៧ថ្ងៃ។ ក្នុងរយៈពេល៧ថ្ងៃនេះគឺ បានកំណត់យកថ្ងៃកណ្តាលថាជាថ្ងៃដែលប្រសើរថ្លៃថ្លាបំផុត ដែលមានឈ្មោះថាជាថ្ងៃសិរីសួស្តីមហាវិជ័យមង្គល មានន័យថាគឺបានប្រារព្ធពិធីបីថ្ងៃមុន និងបីថ្ងៃក្រោយជាថ្ងៃសួស្តីមហាវិជ័យមង្គល។ ដោយសារតែស្ថានភាពប្រទេសកម្ពុជាជួយប្រទះនូវការខ្វះខាតប្រជារាស្ត្ររងទុក្ខលំបាកវេទនាដោយគ្រោះទុរភិក្សនោះ ពិធីរាជាភិសេកនេះត្រូវបានសង្ខេបមកត្រឹមតែ៣ថ្ងៃប៉ុណ្ណោះ។ ក្រសួងព្រះបរមរាជវាំងបានអនុវត្តទៅតាមឯកសារចំនួន៤រួមបញ្ចូលគ្នាគឺៈ
ទីមួយ៖ អនុវត្តតាមឯកសារដែលបានថ្វាយ ព្រះមហាក្សត្រនៅសម័យអង្គរ។
ទីពីរ៖ ឯកសារដែលបានថ្វាយព្រះមហាក្សត្រនៅសម័យឧដុង្គ
ទីបី៖ ឯកសារដែលបានថ្វាយព្រះមហាក្សត្រសុរាម្រិត
ទីបួន៖ ឯកសារដែលបានថ្វាយព្រះមហាក្សត្រនរោត្តមសីហនុ។
មាត្រា៧នៃរដ្ឋធម្មនុញ្ញនៃព្រះរាជាណាចក្រកម្ពុជាយើង បានចែងថាៈ “ព្រះមហាក្សត្រកម្ពុជាទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ។ ព្រះមហាក្សត្រទ្រង់ជាព្រះប្រមុខរដ្ឋមួយជីវិត។ អង្គព្រះមហាក្សត្រមិនអាចនរណារំលោភបំពានបានឡើយ"។
Article Source: C.S.C៖ អ្នកសារពត៌មាន ព្រឹត្តិបត្រអ្នកនាំសារ
|
Print this page
News #116
